Хавдрын бай эмчилгээг орон нутагтаа хийдэг боллоо

Хавдар судлалын үндэсний төв болон хувийн эмнэлгүүдэд хийдэг  хавдрын бай эмчилгээг  Орхон аймаг орон нутагтаа нэвтрүүлээд нэг жил гаруй болж байна.  Тодруулбал, 2023 онд БОЭТ-д эрүүл мэндийн гурван том үйлчилгээг нэвтрүүлж, орон нутагтаа нутагшуулсны нэг нь хавдрын бай эмчилгээ юм.

   Энэ онд БОЭТ  эмчилгээний төрлийг нэмэгдүүлж найм болгосон. Ингэснээр аймгийн хүн амын дунд зонхилон тохиолдож буй ходоод, элэг, умайн хүзүү, түрүү булчирхай, хөх, бүдүүн гэдэсний хорт хавдрын бай эмчилгээг   хийж байна. 

Бай эмчилгээний  нэг тариа 2,5-4 сая, зургаагаас дээш курс хийлгэдэг гэхээр  нэг хүний эмчилгээний зардал  дунджаар  25 сая төгрөг болдог.  Өртөг өндөр энэхүү эмчилгээг орон нутагтаа хийдэг болсноор өвчтөний цаг хугацаа, эдийн засгийг хэмнэх цаашлаад гуравдугаар шатлалын эмнэлгийн ачааллыг бууруулсан үр дүн гарч байна. 

Өнөөдрийн байдлаар  бай эмчилгээг 86 иргэн орон нутагтаа хийлгэж байна.  Бай эмчилгээ нь биед үүссэн хавдрын эсрэг чиглэсэн өвөрмөц эмчилгээ бөгөөд хавдрын хэмжээг багасгаж, ургалтыг сааруулдаг. Өөрөөр хэлбэл, хими эмчилгээтэй харьцуулахад эрүүл эс, эдийг бага гэмтээж зөвхөн хавдрын эсийг онилж эмчилдэг гэсэн үг юм. 

Орон нутгаас бай эмчилгээг хийхэд шаардлагатай 235 сая төгрөгийн тоног төхөөрөмжийн санхүүжилтыг шийдвэрлэснээр 21 аймгаас уг эмчилгээг нэвтрүүлсэн анхны  аймаг болсон билээ.