Япон улсын Ниигата мужийн Токамачи хоттой соёлын солилцоог эхлүүлнэ

Аймгийн Засаг дарга М.Түмэнжаргалын урилгаар Япон улсын Ниигата мужийн Токамачи хотын дарга  Ёшифүми  Секигучи болон “Токомачи - Эрдэнэт” анд нөхдийн нийгэмлэг ТББ-ын төлөөлөгчид манай аймагт хүрэлцэн ирээд байна.  Өнөөдөр аймгийн Засаг дарга М.Түмэнжаргал, Засаг даргын Тамгын газрын дарга Ш.Ганболд тэргүүтэй албаны хүмүүс хүлээн авч уулзлаа. 
       Уулзалтаар аймгийн удирдлагуудын зүгээс хоёр хотын соёлын солилцоог эхлүүлэх, хамтран ажиллах санамж бичиг байгуулах хүсэлтүүдийг тавьсан юм. Ингэснээр соёлын солилцоог хүүхэд, ахмад настан болон соёл урлагийн ажилчдын солилцоо зэрэг үе шаттайгаар эхлүүлэхээр хэлэлцлээ. Мөн Токамачи хотын дарга  Ёшифүми  Секигучи болон “Токомачи - Эрдэнэт” анд нөхдийн нийгэмлэгийн төлөөлөгчид манай аймгаас ажиллах хүч авах сонирхолтой байгаагаа илэрхийлж байлаа. Мөн эрүүл мэнд, боловсрол зэрэг нийгмийн салбарт хамтран ажиллах боломжтой гэв. 
       Хоёр хотын харилцаа, хамтын ажиллагаа анх 2017 оноос эхэлж байсан түүхтэй бөгөөд 2018 онд цас цэвэрлэх том оврын техникийг манай аймагт үнэ төлбөргүйгээр хүлээлгэн өгч байжээ. 
           Ниигата мужийн Токамачи хотын дарга  Ёшифүми  Секигучи тэргүүтэй төлөөлөгчид өнөөдөр “Эрдэнэт Үйлдвэр” ТӨҮГ, “Эрдэнэт хивс” ХХК-тай танилцана.  

Мэдээллийн төв