Эхний ээлжийн 10 шинэ автобусаа хүлээн авлаа

Орхон  аймаг хотын доторх  нийтийн тээврийн үйлчилгээний чанар,  хүртээмжийг сайжруулах, иргэдийн ая тухтай зорчих нөхцлийг бүрдүүлэх зорилгоор үе шаттай парк шинэчлэлт хийж байна. 

Энэ онд орон нутгийн төсвийн 3.2 тэрбум төгрөгөөр 15 дунд оврын автобус авахаар төлөвлөсний эхний ээлжийн 10 автобусаа  хүлээн авлаа.   Тус бүр нь 268 сая төгрөгийн үнэ бүхий БНХАУ-ын тэргүүлэх автомашин үйлдвэрлэгч  FOTON Моторсын  дунд оврын нийт 40-45 хүний багтаамжтай, хотын стандартад нийцсэн автобус юм. 

Мөн хөгжлийн бэрхшээлтэй иргэн саадгүй зорчих боломжийг бүрдүүлсэн гэдгээрэй онцлогтой.  Тодруулбал, тэргэнцэртэй иргэн бууж, суухад хялбар байдлаар гишгүүрийг шийдсэн, сонсголын болон харааны бэрхшээлтэй иргэнд зориулсан мэдээллийн самбар, дуут дохиотой. 

Энэхүү хөрөнгө оруулалтын ажлыг тендер сонгон шалгаруулалтаар БНХАУ-ын Фотон Моторсын Монгол дахь  албан ёсны дистрибьютер  БОСА Автомотив ХХК нийлүүлж, ийн хүлээлгэн өглөө.  Үлдсэн 5 автобус нийлүүлэгдэх тендер сонгон шалгаруулалт зарлагдан хүлээгдэж байна. 

Сонирхуулахад, FOTON  МОТОРС-ын автобуснууд  Бээжин хотын нийтийн тээврийн 80 хувийг хангадаг бөгөөд   дэлхийн 110 гаруй оронд бүтээгдэхүүнээ нийлүүлдэг үйлдвэр аж. 

Өнгөрсөн онд  HYUNDAI маркийн 12 шинэ автобусаар парк шинэчлэлт хийж,  10-ыг нь хотын доторх нийтийн тээвэрт, хоёр автобус ерөнхий боловсролын  сурагчдад үйлчилж буй.  

Ийн Орхон аймаг хоёр жилийн хугацаанд хотын доторх нийтийн тээвэртээ 27 автобусаар парк шинэчлэлт хийж, нийтийн тээврийн үйлчилгээний чанар хүртээмжийг сайжруулж, иргэдийн саадгүй зорчих нөхцлийг бүрдүүлэхэд анхаарч байна. 

Мэдээллийн төв