Донорууд өнгөрсөн онд 387 хүнд амьдрал бэлэглэжээ

Өнөөдөр цусны донорын дэлхийн өдөр. Энэ өдөр хүн төрөлхтөн хариу нэхдэггүй буянтнуудаа хүндэтгэдэг онцгой өдөр билээ. Манай аймагт 3100 гаруй донор бий. Жилдээ 700 гаран нэгж цус цуглуулдаг ,улсын хэмжээнд цуглуулалтаараа дээгүүр ордог хүн ам  төвлөрсөн онцлогтой  аймаг юм. 

2023 оны байдлаар Бүсийн оношлогоо эмчилгээний төвийн Цусны салбар төв  1500 гаруй нэгж цус цусан бүтээгдэхүүн үйлдвэрлэж,387 хүнд цус цусан бүтээгдэхүүн сэлбэгдэж амьдрал бэлэглэжээ.

      Донорын тоог нэмэгдүүлэх, нийт хүн амыг донор болохыг уриалах, аюулгүй цус, цусан бүтээгдэхүүнээр ард иргэдээ хангах зорилготойгоор 20 дахь жилдээ “Амьдрал бэлэглэсэн 20 жил-донор таньдаа баярлалаа” уриан дор тэмдэглэж байна. 

Дэлхийн эрүүл мэндийн байгууллага, Улаан загалмай, Улаан хавирган сар, Олон улсын цус сэлбэлтийн нийгэмлэг, Олон улсын цусны донор байгууллагуудын холбоод хамтран 2014 оноос эхлэн жил бүр тэмдэглэж ирсэн билээ. 

     Өнөөдөр холбогдох байгууллагуудаас хүндэт доноруудаа хүлээн авч хүндэтгэл үзүүлэхийн зэрэгцээ А.Амарын талбайд иргэдийг донор болохыг уриалах, донорын ач холбогдлыг сурталчлан таниулах арга хэмжээг зохион байгуулав. 

Дэлхийн хэмжээнд жилд 108 сая орчим донорын цус цугладаг бөгөөд түүний 50 хувийг хөгжингүй орнуудад цуглуулан нөөцөлдөг байна. Гэсэн хэдий ч өнөөдөр цөөнгүй улс оронд чанартай, аюулгүй байдлыг хангасан хүрэлцээтэй цус цусан бүтээгдэхүүнээр хангах асуудал одоо хүртэл тулгамдсан асуудлын нэг хэвээр байгаа юм.

 Иймээс ДЭМБ-аас 2020 он гэхэд дэлхийн улс орон бүр сайн дурын, авлагагүй байнгын цусны донороос цус, цусан бүтээгдэхүүний бэлтгэж, хангамжийг сайжруулах зорилго дэвшүүлэн ажиллаж байна.

Өнөөдрийн байдлаар дэлхийн хэмжээнд 62 улс оронд 100 хувь сайн дурын авлагагүй донороос бэлтгэсэн цус цусан бүтээгдэхүүний үйлдвэрлэл хийж байгаа бол 40 орон төрөл төрөгсдийн болон төлбөртэй донороос цус бэлтгэсээр байгаа аж. Донорын цусаар хангах цорын ганц арга зам бол тогтмол бөгөөд сайн дураараа цусаа хандивлах юм гэж ДЭМБ-аас уриалж байна.