Баяр, наадмын үйл ажиллагаанд оролцох хүүхдүүдийн урамшууллыг нэмэв

Аймгийн ИТХ-ын ээлжит бус XVI хуралдаанаар баяр наадмыг зохион байгуулах хорооны бүрэлдэхүүнийг танилцуулж, төсвийн задаргааг хэлэлцэж баталлаа.
Засгийн газрын   2024 оны тавдугаар сарын 29-ний өдрийн 233 дугаар тогтоолоор   Тулгар төрийн 2233, Их Монгол Улсын 818, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103  жилийн ой, Эрдэнэт хот, Эрдэнэт үйлдвэрийг бүтээн босгосон Илгээлтийн эзэдийн 50 жилийн ой, хурдан морины 2024 оны хангайн бүсийн уралдаан, Орхон аймаг, Эрдэнэт хотын баяр наадмыг наймдугаар сарын 1,2-нд тэмдэглэх товийг баталсан. 

Засаг даргын орлогч  Д.Соёлчхүү баяр наадмыг зохион байгуулах хорооны бүрэлдэхүүн   болон  төсвийн задаргааг төлөөлөгчдөд танилцууллаа. 

Баяр наадмын нээлт, хаалтын үйл ажиллагаанд 800 гаруй хүүхдийг оролцуулахаар төлөвлөж буй. Өнгөрсөн жил баяр наадмын урлаг,  соёлын арга хэмжээнд оролцсон хүүхэн багачуудад олгодог мөнгөн урамшууллыг 50 мянган төгрөг болгон нэмэгдүүлсэн.  Энэ жил   Эрдэнэт хот, Эрдэнэт үйлдвэрийг бүтээн босгосон Илгээлтийн эзэдийн 50 жилийн ой тохиож байгаатай холбоотойгоор нээлт, хаалтын арга хэмжээнд оролцох хүүхэд багачуудын урамшууллыг 100 мянган төгрөг болгон нэмэгдүүлэхээр шийдвэрлэлээ.  Үүнд шаардлагатай 40 сая төгрөгийн санхүүжилтыг Шилжих үлдэгдлийн зардлаас шийдвэрлэхээр болов. 

Энэ жилийн баяр наадмыг зохион байгуулах хороон даргаар аймгийн  Засаг даргын орлогч Д.Соёлчхүү, нарийн бичгийн даргаар ЗДТГ-ын Цэргийн штабын дарга, хурандаа Б.Оюунтүлхүүр нар ажиллана.  Бүрэлдэхүүнд холбогдох төрийн  байгууллагуудын  30 орчим төлөөллийг оролцуулан баталсан. 

Баяр наадмын зохион байгуулах хороо нь дэргэдээ гадаад, дотоодын зочид төлөөлөгчдийг хүлээн авах, ёслол хүндэтгэлийн арга хэмжээг зохион байгуулах,  үндэсний бөх, хурдан морь, сур шагайн харваа, хэвлэл мэдээлэл, хот тохижилт, чимэглэл, хэв журам зэрэг 10 салбар комисстой байна.   Энэ жил ийн баяр наадмын нийт төсөв 1 тэрбум 28 сая төгрөг. Салбар комиссуудаас 1 тэрбум 350 сая төгрөгийн санал оруулж ирсэн ч төсөвт багтаахын тулд хасалт хийсэн гэдгийг албаныхан хэллээ. 

Төлөөлөгчид хурдан морины уралдааны зам, сур, шагайн харваан мөнгөн урамшууллыг нэмэгдүүлэх, Эрдэнэт цэнгэлдэх хүрээлэнгийн засвар, тохижилт, баяр наадмыг зохион байгуулах бүрэлдэхүүнд төлөөлөгчдийн төлөөллөөс оруулах  зэрэг асуудлаар  санал хэлж, асуулт асуув.  Ийн баяр наадмыг зохион байгуулах 1 тэрбум 28 сая төгрөгийн төсвийг 65 сая төгрөгөөр нэмэгдүүлж батлахыг төлөөлөгчид дэмжлээ. 

Ингэхдээ  610 сая төгрөгийг Орон нутгийн хөгжлийн сангаас, 200 сая төгрөгийг  Илгээлтийн эзэдийн 50 жилийн ой, хангайн бүсийн хурдан морины уралдаан, баяр наадмыг зохион байгуулах зардлаас, 218 сая төгрөгийг “Эрдэнэт үйлдвэр” ТӨҮГ-ын хамтын ажиллагааны зардлаас гаргаж санхүүжүүлэхээр шийдвэрлэлээ.  Шилжих үлдэгдлийн зардлаас хүүхдүүдэд нэмэлтээр олгоход шаардлагатай  урамшууллын зардал 40 сая, био нойлын асуудлыг шийдэхэд шаардлагатай 25 сая төгрөгийг тус тус нэмж баталлаа.  

Мөн баяр наадмыг зохион байгуулах хорооны бүрэлдэхүүнд хоёр төлөөлөгчийг нэмж оруулахаар болов.