Зарим орон сууцны байрны дээврийг засварлах санхүүжилтыг шийдвэрлэлээ

Аймгийн Засаг даргын зөвлөлийн 2024 оны 12 дугаар хуралдаанаар Болзошгүй аваарын зардлаар хийх ажлын танилцуулгыг хэлэлцэж, санхүүжилтыг шийдвэрлэлээ. 
Хотын захирагчийн албанаас инженерийн шугам сүлжээтэй холбоотой 5 асуудал, дээврийг нь засварлах шаардлагатай орон сууцны 11 байр, өвөлжилтийн бэлтгэл ажлын хүрээнд засварлах, өргөтгөх шаардлагатай дөрвөн инженерийн шугам сүлжээний өнөөгийн нөхцөл байдлыг танилцуулж хэлэлцүүлэв. 

Холбогдох байгууллагаас орон сууцны байруудын дээврийг нь  засварлах нэн шаардлагатайгаар  эрэмбэлэхийн зэрэгцээ  иргэдээс гарсан санал хүсэлтэд тулгуурлаж ийн санал оруулсан байна. 

Зөвлөлийн гишүүд өвөлжилтийн бэлтгэл ажлын хүрээнд засварлах, өргөтгөх шаардлагатай дөрвөн инженерийн шугам сүлжээний асуудлыг дараа дахин хэлэлцэхээр болж бусад асуудлыг дэмжиж шийдвэрлэлээ. 

Инженерийн шугам сүлжээ  засварлах ажлын хүрээнд: 
•    Эрдэнэ баг, Хэмнэл соёлын төвийн гадна бие даасан 10 м3 багтаамжтай бохирын цооног шинээр хийх, 
•    Уурхайчин баг, Уран эгшиг сургуулийн дотор инженерийн шугам сүлжээг засварлах, 
•    Уртбулаг баг, УДТТ-5-5-д гадна цэвэр усны оруулгын шугам шинээр татах, 
•    Кувейтын гудманд байрлалтай салаа шугамын гадна дулааны худаг, сильфон компенсатор солих, 
•    Эрдэнэт цэцэрлэгт хүрээлэнгийн явган зам талбайн гэрэлтүүлгийн тэжээлийн утас солих, 

Дараах 10 орон сууцны байрны дээвэрт засвар хийнэ. 

• 1-18 дугаар байрны 1-р блокны дээвэр 
• 2-26 дугаар байрны 1-р блокны дээвэр 
• 2-34а байрны 1-р блокын дээвэр 
• 3-11 дүгээр байрны 1-р блокын дээвэр 
• 3-16 дугаар байрны 2-р блокын дээвэр 
• 4-20 дугаар байрны 1-р блокын дээвэр 
• 5-13 дугаар байрны 6-р блокын дээвэр 
• 6-5 дугаар байрны 4-р блокийн дээвэр,
• Дэнж баг 40а орон сууцны байрны дээвэр 
• Баянцагаан баг, Төмөр замын 4-р байрны 1-р блокын дээврийн засварт шаардлагатай санхүүжилтыг Болзошгүй аваарын зардлаас шийдвэрлэлээ. 

Мөн БОЭТ-ийн Цайны газрын дээврийн засварт шаардлагатай 44 сая төгрөгийн санхүүжилтыг шийдвэрлэлээ.  2010 онд эмнэлэг өөрийн хөрөнгөөр цайны газрын дээвэрт засвар хийж байжээ.