Даваа гарагийн Засаг даргын шуурхай зөвлөгөөн боллоо

Даваа гарагийн Засаг даргын шуурхай зөвлөгөөнийг аймгийн Засаг даргын орлогч Д.Соёлчхүү удирдан явууллаа.  Тэрээр, хэлтэс агентлагийн удирдлагуудаас дараах асуултыг асууж, асуулттай холбоотой үүрэг даалгавар өглөө. 

-БОЭТ-ийн сувилагч нарын цалин хэдэн хувиар нэмэгдсэн бэ?

БОЭТ-ийн захирал Ц.Наран-Эрдэнэ: Засгийн газрын 105 болон 241 дүгээр тогтоол, мөн өнгөрсөн дөрөвдүгээр сарын 1-нд гарсан тогтоолын дагуу гурван үе шаттайгаар  өнгөрсөн гурван жилийн  хугацаанд сувилагч нарын цалин  нэмэгдсэн. Нарийн мэргэжлийн сувилагчийн цалин  50 орчим хувиар, туслах сувилагч 60 орчим хувиар нэмэгдсэн. 

• Үүрэг даалгавар: Ойрын хугацаанд ЗДТГ-ын Нийгмийн бодлогын хэлтэс Сувилахуйн алба буюу сувилагчийн эрх ашгийг хамгаалдаг байгууллагатай уулзалт зохион байгуулаарай. Уулзалтад биечлэн оролцож энэ асуудлаар санал солилцоно. 

-Авто тээврийн төв  тээврийн хэрэгслийн оношилгооны дараалал хэзээ багасах  вэ. Энэ чиглэлээр ямар арга хэмжээ авч байна вэ? 

Автотээврийн төвийн Дотоод ажил хариуцсан мэргэжилтэн Золзаяа:  5,6,7 дугаар сард тээврийн хэрэгслийн оношилгооны дараалал ихэсдэг. Сүүлийн хоёр долоо хоног цайны цаггүйгээр 08:00-19:00 цаг хүртэл ажиллаж байгаа. Мөн бямба гаригт 09:00-14:00 цаг хүртэл уртасгасан цагаар ажиллаж байна. 

• Үүрэг даалгавар:Ажилчдынхаа ачааллыг нэмэхгүйгээр шийдэх өөр арга  байхгүй байна уу. Тодорхой шийдлийг ойрын хугацаанд танилцуулаарай. 

-2016 оноос хойш орон сууцны байрнуудад гоёлын гэрэлтүүлэг хийсэн. Үүнийг цаашид  нөхөж засварлах уу. Өнөөдрийн байдлаар асалт хэдэн хувьтай байна вэ? 

“Эрдэнэт Ус” ДТС ОНӨХК-ийн захирал Д.Бүүвэйбаатар: Өнгөрсөн онд орон нутгийн төсвөөс орон сууцны гоёлийн гэрэлтүүлгийг засварлах, нөхөлт хийхэд  шаардлагатай төсвийг баталсан. Өнөөдрийн байдлаар ихэнх байрны туузан гэрлийн 3 жилийн баталгаат хугацаа дууссан. Батлагдсан төсвийн хүрээнд эхнээсээ ажлууд хийгдэж байна. Засвар, нөхөлтийн ажил дууссаны дараа нэг мөсөн асаана. Энэ ажлыг “Анд-Энерги”, “Авто мастер” ХХК гүйцэтгэж байна. Ирэх зургаадугаар сарын 15-н  гэхэд дуусгахаар гэрээнд тусгасан. 

• Үүрэг даалгавар: Хугацаанд нь дуусгахад анхаараарай. 

“Орхон АЗЗА” ТӨХК  хот хоорондын авто  зам хэзээ засварлаж дуусах вэ? 

Орхон АЗЗА ТӨХК-ийн захирал С.Гандолгор: Орхон АЗЗА ТӨХК-ийн хариуцаж байгаа хот хоорондын авто замын эхлэх цэг Орхоны гүүр,Орхон Сантын салдаг А1001 авто замын 72 дахь км-ээс  эхэлж, 6 дугаар микрийн Аюулгүйн тойрог буюу 180 дахь км  дээр  дуусдаг.  Мөн   Булган чиглэлийн А1002  авто зам  буюу  Нарангийн гүүр хүртэл 29,7 км авто замыг  хариуцдаг. 
Манай гол эвдрэл Бургалтай буюу 123-163 дахь 40 км дээр  үүссэн. Энэ нь Бургалтайн гүүрнээс Эрдэнэт хаалга хүртэлх авто зам. Бүсийн инженер ирж авто замын нөхцөл байдалтай танилцсан. 193 цэгт авто замын засварын ажил хийх шаардлагатай гэсэн дүгнэлтийг  гаргасан.

193 цэгийн 9450 метр квадрат талбай. Үүний 9300-г нь сууриар солих шаардлагатай гэж үзсэн. Манайх Эрдэнэт хаалганаас эхлээд сууриар нь солиод явж байгаа. Техник хэрэгсэл, хүн хүч зэргээс шалтгаалж  нэг цэг дээр засварын ажил хийхэд 3-4 хоногийг зарцуулж байна. 

Хөшөөтийн давааны наана зам засвар  дээр  өнөөдөр бригад ажлаа эхлүүлсэн. Халуун асфальбетоноор нөхөөгүй, цементэн багсармалаар нөхөж, засварлах ажлыг гүйцэтгэж байна. Хөшөөтийн Даваа орчимд  сууриар нь солих шаардлагатай 2,3 хэсэг газрын эвдрэл  бий. Нөхөөсний бригад Орхон-Сантын гүүр хүртэл хөрөөдсөн. 

• Үүрэг даалгавар:Их Хөшөөт, Бага Хөшөөт хавийн авто замын нэг эгнээ нь  цөмөрсөн эвдрэл үүсчихсэн байна.  Хөрөөдөөд хайргаар дүүргээд явж байгаа нь болж байна. Нэг эгнээ бүтнээрээ цөмөрчихсөн байгаа эвдрэл дээр нэн даруй арга хэмжээ авах хэрэгтэй байна.  Тэнд зам тээврийн осол аваар гарах эрсдэл бий болчхоод байна. Энэ асуудлыг хэрхэн шийдвэрлэсэн талаараа ирэх долоо хоногийн шуурхай дээр танилцуулаарай.