2023 оны үйл ажиллагааны үр дүнгээр тэргүүлсэн таван байгууллагыг журмын дагуу урамшуулна

Төрийн байгууллагуудын 2023 оны үйл ажиллагаанд хяналт шинжилгээ хийсэн шалгалтын дүнг ажлын хэсгээс өчигдөр Засаг даргын зөвлөлийн хуралд танилцууллаа.  Аймгийн Засаг даргын 2024 оны 3 дугаар сарын 18-ний өдрийн А/178 дугаар захирамжаар хяналт, шинжилгээ үнэлгээ хийх ажлын  хэсгийг 14 хүний бүрэлдэхүүнтэйгээр байгуулсан. 

Тус ажлын хэсэг өнгөрсөн гуравдугаар сарын 20-ноос эхлэн Жаргалант, Баян-Өндөр сумын ЗДТГ, 25 агентлагт хуваарийн дагуу хяналт шинжилгээ үнэлгээг хийж гүйцэтгэсэн байна. 
Хяналт, шинжилгээ, үнэлгээг гурван чиглэл, 16 үзүүлэлтээр дүгнэжээ.  Тодруулбал, бодлогын хэрэгжилт, хууль тогтоомж, тогтоол шийдвэрийн хэрэгжилт, байгууллагын үйл ажиллагааны үр дүн, төсвийн ил тод байдал  зэргээр үнэлжээ. 

     Захиргааны байгууллагуудын 2023 оны үйл ажиллагааны үр дүнгээр аймгийн хэмжээнд  Статистикийн хэлтэс нэгдүгээр  байр,  Байгаль орчин аялал жуулчлалын газар,  хоёрдугаар байр,  БШУГ гуравдугаар байр, Цагдаагийн газар дөрөвдүгээр байр, Онцгой байдлын газар тавдугаар байранд  оржээ. 

Өнгөрсөн жил Статистикийн хэлтэс 2022 оны үйл ажиллагаагаараа хоёрдугаар байранд орж байсан бол Байгаль орчин аялал жуулчлалын газар 10 дугаар байранд орж байжээ. Харин БШУГ 16 дугаар байранд,  Цагдаагийн газар 20 дугаар байранд,  Онцгой байдлын газар дөрөвдүгээр байранд орж байжээ. 

Тухайн байгууллагын үйл ажиллагааний үзүүлэлт хойшилж, урагшилсан нь шууд байгууллагын үйл ажиллагааны холбоотой гэдгийг ажлын хэсгээс хэлсэн.  2023 оны үйл ажиллагаа, үр дүнгээр хамгийн өндөр оноо авсан дээрх таван байгууллагыг шилдгээр шалгаруулан аймгийн Засаг даргын 2022 оны А/750 дугаар захирамжаар баталсан  журмын дагуу тус бүр 3 сая төгрөгөөр шагнаж урамшуулахыг зөвлөлийн гишүүд дэмжлээ. 

Хяналт, шинжилгээ, үнэлгээний  зорилго нь...
Бодлогын баримт бичиг, хууль тогтоомж, тогтоол шийдвэрээр өгөгдсөн үүрэг, даалгаврын биелэлт,  байгууллагын чиг үүргийн болон ил тод байдал, хүний нөөц, төсөв санхүү, өргөдөл гомдол, архив албан хэрэг хөтлөлт, төрийн байгууллагуудад хэрэгжүүлж буй И-Оффис систем ашиглан, аймгийн Засаг даргын шуурхай зөвлөгөөнөөс өгөгдсөн үүрэг даалгаврын хэрэгжилт, тусгай үзүүлэлтүүдэд хяналт шинжилгээ хийж, гүйцэтгэлийн үр дүнг үнэлэх, гарсан дүгнэлт зөвлөмжийг дараагийн шийдвэр, бодлого төлөвлөлтөд тусгах, үр нөлөөг нэмэгдүүлэх, хэрэгжилт, зохион байгуулалт, хариуцлагыг сайжруулах юм. 

  Засгийн газрын 2020 оны 206 дугаар тогтоолоор баталсан “Бодлогын баримт бичгийн хэрэгжилт, захиргааны байгууллагын үйл ажиллагаанд  хяналт шинжилгээ, үнэлгээ хийх нийтлэг журам”, аймгийн Засаг даргын 2022 оны А/750 дугаар захирамжаар баталсан“ Аймгийн хэмжээнд мөрдөх бодлогын баримт бичгийн хэрэгжилт болон Захиргааны байгууллагын үйл ажиллагаанд хяналт-шинжилгээ, үнэлгээ хийх нийтлэг журам”-ын дагуу уг ажлыг зохион байгуулжээ.