2024-2025 оны хөдөө, аж ахуйн салбарын өвөлжилтийн бэлтгэл хангах төлөвлөгөөнд 27 арга хэмжээг тусгав

Аймгийн  ИТХ-ын ээлжит 19 дүгээр хуралдаанаар  аймгийн хөдөө, аж ахуйн салбарын 2024-2025 оны өвөлжилтийн бэлтгэл хангах ажлын төлөвлөгөөг хэлэлцлээ. 
Төлөвлөгөөнд мал аж ахуйн чиглэлээр 12,  мал эмнэлгийн ажил үйлчилгээний чиглэлээр 4, газар тариалангийн чиглэлээр 10, хүнсний чиглэлээр 1, нийт 27 заалт бүхий ажлын төлөвлөгөөний төслийг боловсруулжээ. 

“Мал аж ахуйн өвөлжилт, хаваржилтын бэлтгэл хангах ажлын төлөвлөгөө”-ний хүрээнд малчдын төвшинд 11500 тн байгалийн хадлан бэлтгэнэ. Өнгөрсөн жил малчдын төвшинд 9700 тонн хадлан бэлтгэсэн. 
•    Засгийн газрын тогтоолоор батлагдсан төлөвлөгөөний дагуу аймаг, сумын аюулгүйн нөөцийн өвс, тэжээлийг бэлтгэнэ.
•     Бэлчээрийн худаг уст, цэгийн бэлэн байдлыг хангах, шинээр гаргах буюу засварлах ажлыг хугацаанд нь хийж гүйцэтгэнэ.
•    Мал амьтны гоц халдварт өвчнөөс урьдчилан сэргийлэх тандалт шинжилгээ хийх, Жаргалант, Баян-Өндөр сумдын малчдын өвөлжөө, хаваржааг ариутгах халдваргүйжүүлэх ажлыг зохион байгуулах,
•    Хаврын тариалалт, уринш боловсруулалт, ургац хураалтын ажлыг технологийн зохистой хугацаанд чанартай гүйцэтгэх боломж бүрдүүлэх зэргийг тусгажээ. 

Газар тариалангийн чиглэлээр...
Аймгийн хэмжээнд энэ онд 13 аж ахуйн нэгж, 595 өрх газар тариалангийн үйлдэрлэл эрхэлж  нийт 5387 га талбайд тариалалт хийн, 20206 тн ургац хураан авахаар төлөвлөжээ. 

Үүнээс үр тариа 4336 га талбайд тариалалт хийж 7356 тонн, төмс 157 га талбайд тариалж 1879 тонн, хүнсний ногоо 478 га талбайд тариалж 10282 тонн, малын тэжээл 250 га талбайд тариалж 625 тонн, жимс, жимсгэнэ 170 га талбайд тариалж  64 тонн ургац хураан авахаар төлөвлөжээ. 
•    Зоорь агуулахын бэлэн байдлыг хангах, төмс, хүнсний ногооны борлуулалтыг дэмжих, орон нутгийн иргэдийг хямд үнэтэй, чанартай ногоогоор хангах зорилгоор эрт ургацын ногооны борлуулалтын цэг  ажиллуулах, үзэсгэлэн худалдаа зохион байгуулна.
•    Хүн амын хаврын хэрэгцээнд зориулан 200 тн махны нөөц бүрдүүлнэ.