Аймгийн Цагдаагийн газар Hyundai Venue маркийн эргүүлийн 4 шинэ авто машинтай боллоо

Орон нутгийн төсвийн 440 сая төгрөгийн  хөрөнгө оруулалтаар аймгийн Цагдаагийн газарт  эргүүлийн  Hyundai Venue  маркийн 5 шинэ авто машинаар парк шинэчлэлт хийж буй. Өнөөдөр эхний ээлжийн  4 авто машиныг аймгийн Цагдаагийн газарт хүлээлгэн өглөө. 

Өнгөрсөн онд иргэдтэй хийсэн  хэд хэдэн удаагийн уулзалтын үеэр  иргэдээс нийтийн хэв журмыг сахиулах, олон нийтийн аюулгүй байдлыг хангахад эргүүлийн машин шаардлагатай байгаа талаар санал хүсэлтийг ихээхэн гаргаж байсан юм. 

   Тиймээс иргэдийн санал хүсэлтэд тулгуурлан орон нутгийн төсвийн хөрөнгө оруулалтаар энэхүү хөрөнгө оруулалтын ажлыг хийлээ гэж Засаг даргын орлогч М.Түмэнжаргал онцлов. Мөн тэрээр, Цагдаагийн газрын хамт олны  гэмт  хэрэг зөрчилтэй тэмцэх, нийтийн хэв журмыг сахиулах, олон нийтийн аюулгүй байдлыг хангах ажилд нь амжилт хүслээ. 
Тус хөрөнгө оруулалтын ажлыг Дэлхийн авто машины зах зээлд тэргүүлэгч эхний таван үйлдвэрлэгчийн нэг болох БНСУ -ын “Хьюндай Мотор” компанийн Монгол улс дахь албан ёсны дистрибьютор “Монгол Хьюндай Автомотив” ХХК гүйцэтгэж, нийлүүллээ.

Худалдан авах ажиллагааг өнгөрсөн хоёрдугаар сарын 1-нд зохион байгуулж, дээрх компани шалгарсан.  Үлдсэн 1 авто машиныг  энэ сардаа багтаан хүлээж өгнө гэж нийлүүлэгч компаниас мэдээлэв. 

    Аймаг орон нутгийн төсвөөс жил бүр Цагдаагийн  газрын үйл ажиллагаанд шаардлагатай байгаа техник, тоног төхөөрөмжийг худалдан авахад зориулсан хөрөнгө оруулалтыг хийсээр ирсэн. 
Тухайлбал, 2022 онд цагдаагийн газрын сантехникийн засвар, хуяглан хамгаалалттай пургон автомашин худалдан авах, гэмт хэргээс урьдчилан сэргийлэх чиглэлээр шаардлагатай техник хэрэгслийг худалдан авахад 703 сая төгрөгийн хөрөнгө оруулалтыг хийсэн. 
Өнгөрсөн онд мөн шаардлагатай техник хэрэгслийг худалдан авах, олон нийтийн цагдаагийн ажилтны цалин, НДШ-ийн зардал, хурд хэмжигч багаж худалдан авах зэрэгт нийт 621 сая төгрөгийг зарцуулсан бол энэ онд эргүүлийн автомашин бусад шаардлагатай зүйлсэд 1 тэрбум төгрөгийн төсвийг аймгийн ИТХ-аар батлуулан ажиллаж байна. 

Мэдээллийн төв