Өсвөрийн 500 гаруй тамирчин Ази, дэлхийн аваргад оролцох эрхийн төлөө өрсөлдөж байна

Чөлөөт бөхийн өсвөрийн улсын аварга шалгаруулах тэмцээн өнөөдөр Орхон аймагт эхэллээ. Энэ жилийн улсын аваргын тэмцээнийг “Орчин цагийн биеийн тамир үүсэж хөгжсөний 100 жил”, “Анхдагч  илгээлтийн эзэд”-ийн  50 жилийн ойн хүрээнд  зохион байгуулж буйгаараа онцлогтой. Тэмцээнд нийслэлийн 7 дүүрэг, 16 аймгийн өсвөрийн 500 гаруй тамирчин 11 кг-ын  жинд Азийн аварга, дэлхийн аваргад оролцох эрхийн төлөө өрсөлдөж байна. 

Улс эх орныхоо далбааг тив, дэлхийн тавцанд гаргах залуу тамирчдынхаа нэр алдрыг сурталчлан таниулах, тэдний гавьяа зүтгэлийг алдаршуулах, залуу үеийн залгамж халааг бэлтгэх, өсвөрийн тамирчдын ур чадварыг нэмэгдүүлэх нь энэхүү тэмцээний зорилго юм. Монгол Улсад чөлөөт бөхийн спортын хөгжил 60 гаруй жилийн түүхтэй.  Чөлөөт бөхийн өсвөрийн улсын аваргыг 1967 оноос хойш өнөөг хүртэл тасралтгүй зохион байгуулж байна.  

  Энэ удаагийн улсын аваргад манай  аймгийн  “Ирээдүй Одод” сургуулийн тамирчид,  аймгийн  өсвөрийн шигшээ баг, “Хангарди спорт” клубын тамирчид нийт 30 тамирчин оролцож байна. 

Тэмцээний нээлтэд аймаг, орон нутгийн удирдлагууд, эх орныхоо нэрийг тив дэлхийд дуургасан чөлөөт бөхийн ахмад тамирчид оролцлоо.  Чөлөөт бөхийн спортоор хичээллэх хүүхэд, залуучуудын сонирхол жилээс жилд нэмэгдэж,  тамирчид “уртай” болж буйг ахмад тамирчид онцолж байв.

 Тэдгээрийн нэг  Монгол Улсын XX  зууны манлай тамирчин, чөлөөт бөхийн барилдааны дэлхийн  хошой аварга /1974,1975/, олимпийн мөнгөн медальт /1976/,  Монгол Улсын хөдөлмөрийн баатар З.Ойдов гуай “Жил жилийн тэмцээний чансаа, тамирчдын ур чадвар өсөн нэмэгдэж байгаа нь багш, дасгалжуулагчдын ажиллах чадвар сайн байгааг илтгэж байна. Мөн тамирчид хичээл зүтгэлтэй  байгаатай холбоотой юм.  

Орон нутагт тэмцээнийг зохион байгуулна гэдэг нь энэ спортоор хичээллэх хүүхэд, залуусын сонирхлыг  нэмэгдүүлэх ач тустай. Орхон аймаг, Эрдэнэт хот  биеийн тамир, спортыг дэмждэгээрээ онцлогтой. Энэ хэрээрээ хүүхэд, залуус нь спортлог байдаг” хэмээн сэтгэгдлээ хуваалцав. Орхон аймаг хүүхэд залуус, иргэдийг спортоор хичээллэх боломж, нөхцлийг бүрдүүлэх, тамирчдынхаа амжилтыг нэмэгдүүлэх зорилгоор олон талт арга хэмжээг хэрэгжүүлж буй.

Тухайлбал, тамирчдынхаа техник хэрэгсэл, сургалтын хэрэглэгдэхүүнийг үе шаттай шинэчлэх, спортын заал танхим байгуулах, орчинг нөхцлийг сайжруулах ажлын хүрээнд орон нутгийн төсөвтөө жил 300 сая төгрөгийг тусгадаг. Үүний үр дүнд 2023 онд манай аймгийн тамирчид улс, бүс, тив, дэлхийн тэмцээн уралдаанаас  168 алт, 159 мөнгө нийт 483 багц медаль хүртсэн амжилтыг үзүүлсэн. 

Тэмцээнийг олон улсын зэрэгтэй  6, улсын 24 шүүгч дэлхийн бөхийн холбооны дүрмийн дагуу шүүн явуулж байна.   Ерөнхий зохион байгуулагчаар Орхон аймгийн ИТХ, ЗДТГ, хамтран зохион байгуулагчаар аймгийн Биеийн тамир спортын газар,  Монголын чөлөөт бөхийн холбоо, "Эрдэнэт Үйлдвэр" ТӨҮГ-ын Хангарди спорт цогцолбор, Орхон аймгийн чөлөөт бөхийн холбоо  ажиллаж байна.