Эрүүл мэндийн байгууллагуудтай хамтын ажиллагааны гэрээ байгууллаа

Өнөөдөр аймгийн Засаг даргын орлогч М.Түмэнжаргал, Эрүүл мэндийн газрын дарга Д.Сүхээ нар  8 өрхийн эрүүл мэндийн төв, Баян-Өндөр мед нэгдсэн эмнэлэг болон 11 ор бүхий клиник эмнэлэгтэй  2024 оны хамтын ажиллагааны гурвалсан гэрээнд гарын үсэг зурлаа. 

Жил бүр өрхийн эрүүл мэндийн төвүүд болон хувийн хэвшлийн ортой эмнэлгүүд аймгийн Засаг дарга, Эрүүл мэндийн газартай хамтарсан гэрээ байгуулдаг билээ.
Өнгөрсөн онд 8 өрхийн эрүүл мэндийн төв, хувийн хэвшлийн эрүүл мэндийн 12 ор бүхий клиниктэй гэрээ байгуулан ажилласан. Гэрээг дүгнэхэд өрхийн эрүүл мэндийн төвүүдтэй байгуулсан гэрээний хэрэгжилт дунджаар 88,3 хувь,  хувийн хэвшлийн ор бүхий клиникүүдтэй байгуулсан гэрээний хэрэгжилт 95,3 хувьтай  дүгнэгдсэн.

2024 оны гэрээнд...

•  Эрүүл мэндийн сайд, аймгийн Засаг даргатай 2024 онд хамтран ажиллах гэрээ
•  Аймгийг 2024 онд хөгжүүлэх  жилийн төлөвлөгөө
•  Салбарын 2024 оны бодлого, төлөвлөлтийг  тусгалаа. 

 Өрхийн эрүүл мэндийн төвүүдийн санхүүжилт 17 хувиар  нэмэгдэж,  тоног төхөөрөмжийн хангалт 95 хувьд хүрсэн. Эрүүл мэндийн анхан шатны байгууллагад ажиллах нарийн мэргэжилтнүүдийн эзлэх хувь 60 хувьд хүрч тусламж үйлчилгээний нэр төрөл, чанар хүртээмж нэмэгдүүлэв. Үүний үр дүнд иргэдийн сэтгэл ханамж 92,5 хувьтай үнэлэгдэн, өргөдөл, гомдол 40.7 хувиар буурсан үзүүлэлттэй байна. 

Мөн Хувийн хэвшлийн эрүүл мэндийн байгууллагуудын  оношилгооны чадавх 90 хувь болсон нь  өмнөх оны мөн үетэй харьцуулахад 23 хувиар  нэмэгдсэн үзүүлэлт юм. Амбулатори, сэргээн засах, өдрийн эмчилгээний тусламж үйлчилгээ зэрэг 3-5 төрлийн тусламж үйлчилгээг нэмэгдүүлэн үйлчлүүлэгчийн хүлээгдлийг өмнөх оноос 1,2 дахин бууруулж ажилласан зэрэг амжилттай байна. 
Энэ онд анхан шатны эрүүл мэндийн байгууллагын тоног төхөөрөмжийн хангалтыг сайжруулах чиглэлээр орон нутгийн төсвөөс 60 сая, “Анхны-Оч” өрхийн эрүүл мэндийн төвийн дээврийн болон дотоод засварт орон нутгийн төсвөөс 253 сая төгрөгийн санхүүжилтыг  шийдвэрлэсэн. Мөн улсын төсвийн  3.2 тэрбум төгрөгийн хөрөнгө оруулалтаар “Үйлсбадрах”  өрхийн эрүүл мэндийн төвийг барих юм.