Орхон аймгийн дахин төлөвлөлт хөгжлийн шинэ үеийг эхлүүлнэ

Монгол Улсын төсвийн орлогын 7,5 хувь, нийт экспортын 10 хувийг дангаараа бүрдүүлдэг Эрдэнэт хот байгуулагдаад 46 жил болж байна. Энэ хотыг  байгуулахад ЗХУ-ын зураг төслийн 40 гаруй институт оролцсон гэдэг. Хотыг анх төлөвлөхдөө 30 мянган хүн амтай байхаар тооцсон ч нийгэм, эдийн засгийн давуу байдлаас улбаалж өдгөө 107 мянган хүн амтай болтлоо өргөжсөн. Тиймээс Орос-Монголын найрамдлаар боссон хот цаашид хэрхэн хөгжих, яаж өргөжих, хөрөнгө оруулагчдыг хэрхэн татах нь  орон нутгийн удирдлагуудын бодлого, шийдвэр, санаачилгаас ихээхэн шалтгаална. Иймд тулгамдаж буй асуудлаа эрэмбэлж түүнийг шийдвэрлэх аргачлалыг боловсруулж, хэрэгжүүлэхэд  хамтрагч түншээ сонгож эхлээд байна.

Өөрөөр хэлбэл, Эрдэнэт хот “Аж үйлдвэрийн парк”  байгуулж Хойд бүсийн /Орхон, Булган, Хөвсгөл/ эдийн засгийн гол төв болох зорилтоо хэрэгжүүлэхийн тулд БНСУ-ын “BK Holding’s” групптэй хамтран ажиллах гэрээ байгуулж  тэднийг төлөөлж Эрдэнэт хотод ажиллах “BK Mongolia” ХХК өнгөрсөн онд байгуулагджээ.

Энэ ажлын хүрээнд “BK Holding’s” группын урилгаар энэ сарын 2-8 хүртэл УИХ-ын гишүүн Д.Батлут, аймгийн ИТХ-ын дарга Д.Мөнхбат, аймгийн Засаг даргын орлогч М.Түмэнжаргал, ХББЗА-ны дарга П.Баясгалан нар БНСУ-д албан айлчлал хийлээ.