Нийгэмшүүлэх үйлчилгээнд 40 орчим иргэн хамрагдаж байна

Аймгийн Хөдөлмөр, халамжийн үйлчилгээний газар гэр оронгүй, согтууруулах болон мансуурах донтой иргэдийг өвлийн улиралд түр хоноглох, хооллох, нийгэмшүүлэх ажлыг 2012 оноос хойш зохион байгуулж буй. 

  Уг үйлчилгээнд жилд дунджаар 35-40 иргэнийг хамруулдаг. Иргэдийн хооллох, хоноглох зардлын Нийгмийн халамжийн сангаас зарцуулдаг бол бусад хувцас, эрүүл мэндийн үзлэг, оношилгоо, эмчилгээ, сургалт, нөлөөллийн  үйл ажиллагааны санхүүжилтыг орон нутгийн төсвөөс санхүүжүүлж ирсэн билээ. 

Энэ жилийн тухайд 40 орчим иргэн уг үйлчилгээнд хамрагдаж байна.  Сургалт, нөлөөллийн арга хэмжээг мэргэжлийн  байгууллагуудтай хамтран архины хамаарлаас гарах, гэр бүлийн үнэ цэн, нийгэмд эзлэх өөрийн байр сууриа  олох зэрэг олон  сэдвийн хүрээнд харилцах ярилцах, сэтгэл зүйн ганцаарчилсан зөвлөгөөг өгч байна. 

Ингэснээр  өөрөө өөртөө итгэх итгэлийг олж авч,  байнгын болон түр ажлын байранд зуучлагдах, хамт олонтой болох, архины хамаарлаас татгалзах зэрэг олон эерэг үр дүн гарч буй аж. 
Нийгэмшүүлэх үйлчилгээг “Хамтдаа тэмүүлэх гэрэлт ирээдүй”, “Архидалт мансуурлын эсрэг ассоциаци” ТББ-аар гэрээлэн гүйцэтгүүлдэг.  Эдгээр байгууллагууд нь хавар, зуны цагт үйлчилгээнд хамрагдсан иргэдийн хамт газар тариалан, мод үржүүлгийн ажил эрхлүүлдэг байна. 

2012 оноос хойш  уг үйлчилгээнд давхардсан тоогоор нийт 140 гаруй иргэн хамрагдсанаас 30 орчим нь  архины хамаарлаас бүрэн гарч, гэр бүлдээ эргэн очсон сайн үр дүн гарчээ.