Эрдэнэт мөнгөн өвөл-2024 нээлттэй тэмцээн эхэллээ

Гурав дахь жилдээ зохион байгуулж буй “Эрдэнэт мөнгөн өвөл-2024” нээлттэй тэмцээн өнөөдөр гүйлтийн цанын төрлөөр  Сархиа цанын бааз дээр эхэллээ. 
Орхон аймаг “Өвлийн спортыг хөгжүүлэх хөтөлбөр”-ийг 2020-2023 онд амжилттай хэрэгжүүлж, өнгөрсөн онд орон нутагтаа өвлийн спортын хоёр наадмын төрлийг амжилттай зохион байгуулсан.  Мөн   баг тамирчдынхаа амжилтыг нэмэгдүүлэх, туршлага солилцох боломж нөхцөлийг бүрдүүлсэн олон арга хэмжээг хөтөлбөрийн хүрээнд хэрэгжүүлсэн билээ. 

   Энэ удаагийн тэмцээнд Орхон, Баянхонгор, Сэлэнгэ,Өвархангай зэрэг 9 аймаг, нийслэлийн 2 клубын 100 гаруй тамирчин 5 насны ангиллаар хурд, хүч, авхаалж самбаагаа сорьж байна. 
Түүнчлэн Монголын тусгай олимпийн хороотой хамтран " Эрдэнэт мөнгөн өвөл-2024"-д хөгжлийн бэрхшээлтэй иргэдийг оролцуулж буйгаараа онцлог болж байна. 
Тодруулбал, 2025 онд Италид болох тусгай олимпын өвлийн наадамд оролцох эрхээ авсан  Орхон аймгийн гүйлтийн цанын тамирчин Б.Идэр "Эрдэнэт мөнгөн өвөл-2024"-д оролцож 
бэлтгэлээ хангаж байна. 

Аймгийн Биеийн тамир, спортын газрын дарга Д.Дэлгэрбаяр  “Ирэх жилүүдэд тэшүүр, шорт рейк гэхчлэн өвлийн спортын бүхий л төрлөөр өргөн хүрээнд зохион байгуулахаар зорьж, төлөвлөж байна” гэлээ.    Тэмцээний уулын цана, снөүбордын төрөл ирэх хоёрдугаар сард болох юм. 
 

Мэдээллийн төв