Авто замд давс бодис цацах ажил үргэлжилж байна

Админ  2023-10-30  59 

         Өнөөдөр өглөө орж эхэлсэн цасыг цэвэрлэх, авто замд үүссэн халтиргаа гулгаанаас сэргийлэх зорилгоор давс бодис цацах ажил үргэлжилж байна. 
Хот тохижуулах газрын зүгээс хотын доторх 130 километр авто замын цэвэрлэгээ арчилгааг хариуцдаг. Өнөөдөр тусгай тоноглол бүхий 6 авто техник, давс бодис цацах зориулалттай механикжуулсан тоног төхөөрөмж, зам талбайн цэвэрлэгээ үйлчилгээний жижиг бага оврын зургаан механизмтайгаар давс бодис цацалтын ажлыг эхлүүлсэн. Түүнчлэн зам талбайн үйлчлэгч, давс бодис ачигч гэсэн нийт 144 ажилтан албан хаагч ажиллаж байгаа юм. Нийт 210,000 кг давс, 10,000 кг бодис, 16 метр куб хайрганы нөөцтэй байгаа талаар хот тохижуулах газрын дарга Б.Мөнхдалай хэллээ.  
       “Орхон АЗЗА” ТӨХК-ний хувьд  А1001 замын хөшөөт чиглэлд,  А1002 зам  Эрдэнэт-Булганы чиглэлд цас цэвэрлэгээ болон давс бодис цацах ажлыг хийж байна. 
Хог хаягдлын тухай хуулийн 10 дугаар зүйлийн 10.2.10-т зааснаар Аж ахуйн нэгж, байгууллагын орчны 50 метр хүртэлх нийтийн эдэлбэр газрын хог хаягдал, цас мөсийг тухайн аж ахуйн нэгж цэвэрлэх үүрэгтэй байдаг. Иймд иргэдийг орчны 50 метрийн цас, мөсний цэвэрлэгээгээ хийж хамтарч ажиллахыг уриаллаа. 

Мэдээллийн төв