Цагаанчулуут, Найрамдал, Чандмань багийн иргэдтэй уулзлаа

Цагаанчулуут, Найрамдал, Чандмань багийн иргэдтэй уулзах уулзалт өчигдөр 18.00 цагт Хүүхдийн ордонд боллоо.  Тус багийн иргэдийн зүгээс хөрөнгө оруулалт бүтээн байгуулалтын ажилд тавих хяналтаа сайжруулах, иргэдэд үйлчлэх нэгдсэн төв, түлээ түлшний үнэ, агаарын бохирдол, камержуулалт, ногоон байгууламж нэмэгдүүлэх, хүүхдийн тоглоомны талбайн тохижилт, нийтийн тээврийн цагийн хуваарийг сунгах, эрүүл мэнд тэр дундаа өрхийн эмнэлгийн харилцаа хандлага, иргэдэд үзүүлэх үйлчилгээнд анхаарах гэх мэт асуудлаар  санал хүсэлтээ илэрхийллээ. 

Мөн “Эко” хорооллын гадна шугам сүлжээг цаг алдалгүй засварлаж, шинэчилсэнд талархал илэрхийлж байв. 

Уулзалтын эхэнд 2023 онд улс болон орон нутгийн  төсвөөр дээрх багт  хийж буй хөрөнгө оруулалт, бүтээн байгуулалтын ажлын талаарх мэдээллийг  өгсөн. Үүний дараа  аймгийн  ЗДТГ-ын Төрийн захиргаа удирдлагын хэлтсийн дарга М.Жанболат өнгөрсөн хоёрдугаар сард дээрх багийн иргэдтэй уулзах үеэр гарсан санал хүсэлтийг эрэмбэлж, хэрхэн шийдвэрлэсэн талаарх мэдээллийг өгөв. 

Өнгөрсөн хоёрдугаар сард тус багийн иргэдээс сургууль, цэцэрлэгийн хүртээмжийг нэмэгдүүлэх асуудалд анхаарах саналыг  ихээр гаргасан.  Үүнийг шийдвэрлэж орон нутгийн төсвийн хөрөнгө оруулалтаар Найрамдал, Чандмань багт 150 хүүхдийн багтаамжтай цэцэрлэг барих ажлыг өнгөрсөн хавар эхлүүлж, оны өмнө ашиглалтад оруулахаар төлөвлөж байна. 

Мөн өнгөрсөн сард Монгол Улсын Ерөнхий сайд Орхон аймагт ажиллаж, иргэдтэй уулзах үеэр шинэ  суурьшлын бүсийн сургууль, цэцэрлэгийн  хүртээмжийн асуудлыг танилцуулж,  960 хүүхдийн суудалтай хоёр сургууль барих төсвийг 2024 оны улсын төсөвт суулгаж шийдвэрлүүлсэн билээ. Энэ хүрээнд 2а, VII  хорооллын сургуулийн барилгын ажил ирэх онд эхэлнэ. Ингэснээр дээрх багуудад сургууль, цэцэрлэгийн хүртээмж нэмэгдэх юм. 

Орхон аймаг, Эрдэнэт хотыг хөгжүүлэх ерөнхий төлөвлөгөөний хүрээнд Баян-Өндөр сумын VI бичил хорооллын уулзвараас Их залуу багийн уулзвар хүртэлх А1002 дугаартай улсын чанартай авто замыг 4 эгнээ болгон өргөтгөн шинэлэх ажлын зураг төсөв бэлэн болсон.   17 тэрбум төгрөгийн санхүүжилтээр 25,5 метр өргөнтэй, зорчих хэсэг нь 3,8 км урттай дөрвөн эгнээ зам байхаар төлөвлөж байна гэх мэдээллийг өглөө. 

Уулзалтын үеэр иргэдээс гарсан саналыг эрэмбэлж, 2024 оны орон нутгийн төсөвт иргэдэд үйлчлэх нэгдсэн төв барих газрыг тогтоож, зураг төсвийг хийхээр боллоо. 
Мөн хэсгийн цагдаагийн автомашин, Цагаанчулуут багийн 29 дүгээр гудманд явган хүний гарц зэрэг хэд хэдэн асуудлыг ирэх оны төсвийн төсөлд тусгахаар болов.

2023 онд Цагаанчулуут багт 800 орчим сая төгрөгийн хөрөнгө оруулалтаар долоон нэр төрлийн ажил гүйцэтгэжээ.  Багийн явган хүний замын тохижилт, сайжруулсан шороон зам засварлах ажил, 26 дугаар цэцэрлэгт бараа, тоног төхөөрөмж нийлүүлэх зэрэг дөрвөн ажил 100 хувийн гүйцэтгэлээр дууссан байна. 

Харин Найрамдал багт энэ онд төлөвлөсөн 6 нэр төрлийн ажил бүгд 100 хувийн гүйцэтгэлээр дуусчээ.

 Гэр хорооллыг дахин төлөвлөж барилгажуулах ажлын хүрээнд тус багт 49-53 дугаар гудманд УДДТ барих ажлыг орон нутгийн төсвийн нэг тэрбум 107 сая төгрөгийн санхүүжилтээр, 7а хороололд явган хүний зам хийх, Хүүхдийн ордны гадна талбайн тохижилт зэрэг ажлыг гүйцэтгэсэн.  

Чандмань багт долоон ажил төлөвлөснөөс таван ажил 100 хувийн гүйцэтгэлтэй, 80-аас дээш хувийн гүйцэтгэлтэй хоёр ажил байна. Тухайлбал, 7-р хорооллын дотор замтай холбох үлдэгдэл замыг хийх, хуучин цамхагт гэрэлтүүлгийн шон дээр гэрэлтүүлэг, камержуулалт хийх, 7 дугаар хороололд явган зам дагуу гэрэлтүүлэг шинээр хийх /130 метр газар/ зэрэг ажил бий. 

Мэдээллийн төв