Иргэдтэй хийх уулзалт эхэллээ

Аймгийн Засаг дарга С.Батжаргал Баян-Өндөр, Жаргалант сумын иргэдтэй хийх уулзалт өнөөдөр Наран, Рашаант, Уртын  гол багаас эхэллээ.  Уулзалтаар энэ онд хийж хэрэгжүүлж буй ажлын тайлан, мэдээлэл, ирэх онд улс болон  орон нутгийн төсвийн хөрөнгө оруулалтаар хийх ажлын талаарх мэдээллийг өгөв. Мөн энэ оны нэгдүгээр сард иргэдтэй хийсэн уулзалтаас гарсан санал хүсэлтийн шийдвэрлэлтийг танилцууллаа. 

Бүтээн байгуулалтын ажлаас хамаарч улс болон орон нутгийн  төсвийн хөрөнгө оруулалтаар хийж буй ажлын  төсөв баг бүрт харилцан адилгүй бий. Тухайлбал, Наран багт энэ онд улс болон орон нутгийн төсвийн 3,6 тэрбум төгрөгөөр 7 ажил төлөвлөгдсөнөөс 6 нь 100 хувийн гүйцэтгэлтэйгээр дуусаад байна. 

Болзошгүй аваарын зардлаар 2023 онд дээрх багуудад 128 сая төгрөгийн санхүүжилтээр 7 ажил хийж гүйцэтгэснээс 100 хувийн гүйцэтгэлтэй ажил дууссан дөрөв, 90-ээс дээш хувийн гүйцэтгэлтэй хоёр ажил байна гэх мэдээллийг аймгийн удирдлагууд өгөв. 

Эдгээрээс дурьдвал, Уртын гол багт сайжруулсан шороон замын хэсэгчилсэн засвар, Рашаант багийн авто замын нөхөөсний ажил, үерийн хамгаалалтын сувгийг нээж, ухах, доторх хайргатай шаварлаг хөрсийг цэвэрлэх зайлуулах зэрэг ажил багтжээ.  Иргэдийн зүгээс  тогны хүчдэл, нийтийн тээврийн хүртээмж, автобусны жолооч нарын харилцаа хандлага, гэрэлтүүлэг, камержуулалт, инженерийн шугам сүлжээ, хог хаягдлын менежмент зэрэг асуудлаар санал хүсэлтээ илэрхийллээ. 

Тухайлбал, уулзалтад оролцсон иргэдээс цахилгаан эрчим хүчний хүчдэлийн уналттай  холбоотой санал, хүсэлт их гарсан.   

Дэлхийн банкны Олон улсын хөгжлийн ассоциацийн хөнгөлөлттэй зээлээр гэр хорооллын эрчим хүчний хүчдэлийг сайжруулах төсөл “ЭБЦТС” ТӨХК дээр  “Эрчим хүчний II” төсөл хэрэгжиж буй. Төслийн хүрээнд  гэр хорооллын 12 багийн 66 дэд станцын шугамыг шинэчилж, үр дүнд 18 мянган хэрэглэгч цахилгаан эрчим хүчний найдвартай эх үүсвэрээр хангагдаж, хүчдэлийн уналтгүй болно. Ирэх  оны гуравдугаар сард төсөл  хэрэгжиж  дуусна гэх мэдээллийг “ЭБЦТС” ТӨХК-иас  уулзалтын үеэр иргэдэд өглөө.

Мөн Эрдэнэт хотыг тойрсон 35 мВт-ын  өндөр хүчдэлийн шугам татах ажлын  судалгааг гаргаж, зураг төсвийг хийж байна. Нийт 27,6 км шугам татсанаар гэр хорооллын айл өрхийн цахилгаан эрчим хүч сайжирна. 

Орхон аймаг гэр хорооллын цахилгаан эрчим хүчний найдвартай үйл ажиллагааг дэмжих, эрчим хүчний уналтыг бууруулах, хүчдэлийн алдагдалд оруулахгүй байх зорилгоор Цагаанчулуут багийн нутаг дэвсгэрт дэд станцын өргөтгөлийг 2022 онд  орон нутгийн төсвөөр барьж байгуулах ажлыг эхлүүлсэн. Орон нутгийн төсвийн 2,5 тэрбум төгрөгийн өртгөөр 35/6кВ-ын 2*10000 кВа хүчин чадалтай уг дэд станц ашиглалтад орж,  Дэнж, Эрдэнэ Яргуйт, Шанд багийн айл өрхийн цахилгаан эрчим хүч нэмэгдсэн. 

Гарсан санал хүсэлтийг эрэмбэлж ирэх оны төсөвт суулгах, иргэдээс гарч буй шинэ санал санаачилгыг дэмжиж ажиллахаа Засаг дарга С.Батжаргал илэрхийллээ. 

Мэдээллийн төв