Цахилгаан бойлуураар халдаг “Эко” хорооллын айл өрх, ААНБ төвийн дулаанд холбогдох боломжтой боллоо

 “Эко” хорооллын 113 өрх, 5 ААНБ-ыг  төвийн дулаанд холбогдох боломж, нөхцөлийг  бүрдүүллээ.  Тус хорооллын зүүн талын төв  магистрал 275 метр  урттай  сувагт 5 хос шугамыг шинэчлэх  ажил жигдэрч, хоёр хоногийн өмнө айл өрх, ААНБ-ыг дулаанаар бүрэн хангасан.  

275 м урттай 5 хос шугамын шинэчлэлд...

• долоон ширхэг дулааны худаг
• дулааны өгөх буцах  Ф125мм*2ш шугам, цэвэр усны  Ф100мм*1ш шугам
• Нэмэлтээр хэрэглээний халуу усны өгөх буцах Ф100мм*2 ширхэг шугамыг угсарч төвийн дулаанд холбогдох нөхцлийг бүрдүүллээ. 

Тодруулбал, хэрэглээний халуун усны өгөх буцах шугамыг нэмэлтээр гүйцэтгэж, халаалт  цэвэр усны шугамыг өргөтгөн нэвтрэх чадварыг нэвтрүүлэв.  

Болзошгүй аваарын зардалд шилжүүлснээр журамд заасны дагуу төсөвт өртгөөс ашиг хассан  зардал  99.1 сая төгрөгөөр Ус дулаан хуваарилах төвд нэмэлт тоноглолыг угсарч, гурван  хос шугамыг өргөтгөж  шинэчилснээр айл өрхөд очих даралт өсч,  халаалтын чанар сайжрах юм. 

Үүнд, Ус дулаан хуваарилах төвд халаалтын насос  2 ширхэг, нэмэлт усны насос 1 ширхэг, давтамж хувьсгуур зэрэг тоногллолуудыг угсарч, 50 метр урттай 3 хос шугамыг өргөтгөж шинэчлэх ажлыг гүйцэтгэлээ. 

Шинээр угсарсан  5 хос шугамнаас  салбарлан  татсан  3 хос шугамууд нь амины орон сууцнуудыг дулаанаар хангаж буй.  Цаашид даралт өссөнөөр хуучин салбар шугамууд нэмж хагарах, даралт даахгүй байх эрсдлүүд үүсэх магадлал өндөр байгааг мэргэжлийн байгууллагаас хэллээ. Тиймээс оршин суугчид шугамаа шинэчлэх ажлын зардлаа өөрсдөө шийдвэрлэж, халуун усны шугамаа татах ёстойг хэлж байна. Ингэснээр цахилгаанаар усаа халаах зардлаа хэмнэх боломжтой юм. 

“Монгол дайван” ХХК гүйцэтгэсэн “Эко” хорооллын гадна инженерийн шугам сүлжээ ашиглалтад орсноосоо хойш таван жилийн дараа буюу 2019 оноос хойш удаа дараа гэмтэл гарч, өнгөрсөн хавар аваарын байдалд шилжээд  байсан юм. 

Долоодугаар сард аймгийн ИТХ-ын хуралдаанаар тус хорооллын зүүн талын төв  магистрал 275 м урттай 5 хос шугамын засвар, шинэчлэлийн 543 сая төгрөгийн  санхүүжилтыг   шийдвэрлэсэн.  Цаг хугацаа алдахгүй байх үүднээс Болзошгүй аваарын зардал руу төсвийг  шилжүүлж, 10 хоногийн өмнөөс “Эрдэнэт ус ДТС” ОНӨХК шугам, сүлжээ шинэчлэх ажлаа эхлүүлсэн. 

Хуучин шугамуудын гэмтлийг газар дээр нь нээн задалж үзэхэд  дулаалгын мөнгөлөг цаас, гадна сүвлэсэн атираат бохирын шугамын хоолой зэрэг нь агаар нэвтрүүлэхгүй шугаманд үүссэн хөлрөлтийг гадагшлуулалгүй дотогшоо чийг цохисноос зэврэлт үүсч шугам цоорсон байх магадлалтай  гэж мэргэжлийн байгууллагаас  үзсэн.  Мөн дулааны худгийг стандартын бус ф1000 мм-ийн кольцо болон өрлөгөөр 1,2 м гүнтэй угсарсан байжээ. 

Мэдээллийн төв