Төрийн хэмнэлтийн тухай хуулийн хэрэгжилт Орхон аймагт 94 хувьтай байна

Монгол Улсын Засгийн газраас 2022 онд батлан хэрэгжүүлж эхэлсэн “Төрийн хэмнэлтийн тухай хууль”-ийн хэрэгжилт Орхон аймагт 94 хувьтай  байна. Өнөөдөр аймгийн ИТХ-ын Зөвлөлийн хуралд Төрийн хэмнэлтийн тухай хууль  орон нутагт хэрхэн хэрэгжиж байгаа талаар мэдээллийг ажлын хэсгээс танилцууллаа. 

    Төр, түүний бүх шатны байгууллага, нийтийн алба, тэдгээрийн үйл ажиллагаанд санхүүгийн сахилга батыг мөрдүүлж, ил тод байдлыг хангах, үр ашгийг нэмэгдүүлэх, үрэлгэн байдлыг хязгаарлах, хяналт тавихтай холбогдсон харилцааг зохицуулах зорилготой уг хуулинд орон нутагт хамааралтай 14 зүйл байгаа ажээ. 

     Тухайлбал, аймгийн болон сумдын Засаг дарга нар нэгээс илүүгүй Засаг даргатай байх, зөвлөхийн чиг үүрэг бүхий албан тушаалтан байхыг хориглох, орлогч, зөвлөхийн чиг үүрэгтэй ижил эрх, үүрэг бүхий өөр нэршилтэй албан тушаалын орон тоо бий болгох, түүнд аливаа албан тушаалтныг томилох, орон тоог хэвээр хадгалахыг хориглосон заалтуудыг орон нутаг хэрэгжүүлэн ажиллаж байна. 

Түүнчлэн Иргэдийн Төлөөлөгчдийн Хурлын дарга, аймгийн Засаг дарга сум, дүүргийн Засаг даргаас бусад этгээд албан тушаалын суудлын жижиг автомашин ашиглахыг хориглосон байдаг. Үүний хүрээнд ажлын шаардлагын дагуу өрхийн эрүүл мэндийн төв, тусгай чиг үүрэг бүхий байгууллагууд зэрэг 13 байгууллагын 17 тээврийн хэрэгслээс бусад тээврийн хэрэгслийг дуудлага худалдаагаар худалдан борлуулсан. Худалдан авах ажиллагааг 100 хувь цахимаар явуулдаг болсон зэрэг ажлууд нь тус хуулийн хэрэгжилтийг ханган ажиллаж байгаа гэдгийг мэдээллээ.  

Мэдээллийн төв