Эко хорооллын 113 айл өрх, 5 ААНБ-ыг дулаанаар бүрэн хангалаа

Инженерийн шугам сүлжээний насжилт ашиглалтаас хамаарч  хамгийн багадаа 15-25 жил байх ёстой. 2013-2014 онд “Монгол дайван” ХХК-ийн хийж гүйцэтгэсэн “Эко” хорооллын гадна шугам сүлжээ ашиглалтад орсноосоо хойш 5 жилийн дараа буюу 2019 оны халаалтын улирлаас эхлэн гэмтэл гарч эхэлсэн.  Тодруулбал, энэ хугацаанд 20 гаруй удаагийн  гэмтэл гарсан байдаг.  Хамгийн сүүлд өнгөрсөн оны гуравдугаар сарын 15-наас 17-ны хооронд 80 метр газар ухаж  15 удаагийн гэмтэл гарсныг   “Эрдэнэт ус ДТС” ОНӨХК засварласан. 

Баяр наадмын өмнө аймгийн ИТХ-ын хуралдаанаар тус хорооллын зүүн талын төв  магистрал 275 м урттай 5 хос шугамын засвар, шинэчлэлийн 543 сая төгрөгийн  санхүүжилтыг   орон нутгийн төсвөөс шийдвэрлэсэн. Хүйт орохоос урьтаж, цаг хугацаа алдахгүй байх үүднээс төсвийг аваарын зардал руу шилжүүлж, 10 хоногийн өмнөөс “Эрдэнэт ус ДТС” ОНӨХК шугам, сүлжээ шинэчлэх ажлаа эхлүүлсэн билээ. 

Өнөөдрийн байдлаар ажлын гүйцэтгэл 65 хувьтай, тус хорооллын  113 айл өрх, таван ААНБ-ын дулаанаар хангаад байна.  Энэ долоо хоногт шугамыг туршилтын журмаар шалгаж хэвийн гэж үзвэл сувгийг таглаж, гадна тохижилтыг хийхээр төлөвлөжээ. 

 Шугамын гэмтлийг газар дээр нь нээж задалж үзэхэд дулаалгын мөнгөлөг цаас, гадна сүвлэсэн атираат бохирын шугамын хоолой зэрэг нь агаар нэвтрүүлэхгүй шугаманд үүссэн хөлрөлтийг гадагшлуулалгүй дотогшоо чийг цохисноос зэврэлт үүсч шугам цоорсон байх магадлалтай  гэж мэргэжлийн байгууллагаас  үзжээ.  Мөн дулааны худгийг стандартын бус ф1000 мм-ийн кольцо болон өрлөгөөр 1,2 м гүнтэй угсарсан байна. 

Мэдээллийн төв