Төрийн албан хаагчид Тарлан толгойн энгэрт мод тарилаа

Бүх нийтээр мод тарих намрын өдрүүд эхэллээ. Өнөөдөр аймгийн төрийн  байгууллагын албан хаагчид Тарлан толгойн энгэр /Эрдэнэт цэцэрлэгт хүрээлэнгийн урд/ мод тарилаа. 
“Тэр бум мод үндэсний хөдөлгөөн”, "Ногооон Эрдэнэт" хөтөлбөрийн хүрээнд  2021 оноос хойш Орхон аймаг 1 сая 600 мянган ширхэг мод тариад байна.   
2023 онд Орхон аймаг 561 мянган мод тарихаас хаврын  бүх нийтийн мод тарилтаар 300 гаруй мянган ширхэг мод тарьсан. Энэ намрын бүх нийтийн мод тарилтаар 196 мянган ширхэг модыг  15  байршлын 17.5 га талбайд тарина. 

Аймгийн удирдлагууд боломжит газруудад ойн төгөл байгуулахаар зорьж буй. Хоёр жилийн өмнө Баян-Өндөр уулын Хүрэнбулагийн аманд “Гэр бүлийн ойн төгөл”-ийг байгуулж, олон нийтийн оролцоотой мод тарьсан билээ. Өдгөө тус байршилд тарьсан модны ургалт  хамгийн өндөр буюу 95 хувьтай байна.  Мөн өнгөрсөн хугацаанд Сархиа уулын энгэрт төрийн байгууллага, олон нийтийн оролцоотой тарьсан модны ургалт 61 хувьтай тоологджээ.  

Харин энэ жилээс "Эрдэнэт" цэцэрлэгт хүрээлэнгийн урд "Тарлан толгой" уулын хойд энгэрийг ойн төгөл болгохоор зорьж, төрийн байгууллагуудын оролцоотой мод тарих ажлыг эхлүүлээд байна.  Тус газрыг орон нутгийн төсвийн 100 орчим сая төгрөгөөр хашаажуулсан бөгөөд арчлалт хамгаалалтыг Сум, дундын ойн анги хариуцах юм.  
 Бүх нийтийн намрын мод тарилттай холбоотойгоор А.Амарын талбайд 15-ныг хүртэл тарьц суулгацын үзэсгэлэн худалдаа  гарч буй. Иргэд Та бүхэн гэр бүл, найз нөхдөөрөө амралтын өдрүүдэд Тарлан толгойн энгэрт мод тарих боломжтой.