Гүүд Нэйборс ОУТББ нь Орхон аймагт урт хугацааны төсөл хэрэгжүүлэхээр нээлтээ хийлээ

Гүүд Нэйборс Олон Улсын төрийн бус байгууллага нь  хүүхдийн эрх хамгаалал,  боловсрол, эрүүл мэнд, ундны ус, эрүүл ахуй, өрхийн орлого дэмжих урт хугацааны төсөл хэрэгжүүлэхээр Орхон аймагт салбараа нээн ажиллуулж байна. Тэд өнөөдөр төслийн нээлтээ хийлээ. 
          Нээлтийн үйл ажиллагаанд аймгийн Засаг даргын орлогч А.Түвшинжаргал, Баян-Өндөр сумын Засаг дарга Б.Баасансүрэн, Гүүд Нэйборс ОУТББ-ын суурин төлөөлөгч Жу Сүн Хён болон хөгжлийн зөвлөлийн гишүүд, хүүхдийн оролцооны байгууллагуудын төлөөллүүд оролцов. 
          Тус төрийн бус байгууллага нь  тогтвортой хөгжлийн зорилтыг хэрэгжүүлэх замаар орон нутгийн бодлого шийдвэртэй уялдуулан үйл ажиллагаагаа явуулдаг нийгмийн хөгжлийн төлөөх хүмүүнлэгийн байгууллага гэдгийг  Гүүд Нэйборс ОУТББ-ын Монгол дахь төлөөлөгчийн газрын ерөнхий менежер А.Бүрэнжаргал танилцууллаа. 
       Тэд манай аймагт орон нутгийн хөгжлийг дэмжих зорилгоор хүүхдийн эрх хамгаалал,  боловсрол, эрүүл мэнд, ундны ус, эрүүл ахуй, өрхийн орлого дэмжих чиглэлд  хөтөлбөр хэрэгжүүлэн ажиллах юм.  Энэхүү хөтөлбөр таван жилийн хугацаанд хэрэгжинэ.
Түүнчлэн Баян-Өндөр сумын Эрдэнэ, Дэнж, Их залуу, Яргуйт, Баян-Овоот багууд үндсэн үйл ажиллагаагаа чиглүүлэн ажиллаж одоогийн байдлаар 300 гаруй хүүхэд хамруулаад байна. 

Мэдээллийн төв