Унгар улс Орхон аймагт ЖДҮ-ийг эрчимжүүлэхэд хамтран ажиллахад бэлэн гэв

         Унгар улсаас Монгол улсад суугаа онц бөгөөд бүрэн эрхт элчин сайд Борбала Обрушански өнөөдөр Орхон аймагт ажиллаж байна. 
Түүнийг Ерөнхий сайд асан А.Амарын нэрэмжит танхимд аймгийн Засаг даргын орлогч А.Түвшинжаргал, албаны хүмүүсийн хамт хүлээн авч уулзлаа. Тэрээр хатагтай Борбала Обрушанскийг Орхон аймгийг зорин ирсэнд талархал илэрхийлээд, манай аймаг болон Унгар улсын найрамдалт харилцаа нь Секешфехервар хоттой 2008 онд “Түнш хотууд”-ын “Санамж бичиг” байгуулж байснаас эхлэлтэй гэдгийг дурьдлаа.  
       Түүнчлэн Орхон аймагт хийгдэж буй дахин төлөвлөлтийн төслүүд, хүүхэд хамгааллын талаар хийгдэж буй ажлууд, аялал жуулчлал, хүнс хөдөө аж ахуйн чиглэлд хамтран ажиллах талаар саналыг танилцууллаа. 
         Элчин сайд Борбала Обрушански хэлэхдээ, “Унгар улс хөдөө аж ахуй, мэдээлэл технологи, аялал жуулчлал, жижиг дунд үйлдвэрлэл, уул уурхайн нөхөн сэргээлтийн төслүүдэд хамтран ажиллаж, туршлага хуваалцах, тоног төхөөрөмж нийлүүлэх боломжтой. Мөн Унгар улсад жижиг дунд үйлдвэрлэл эрчимтэй хөгжсөн. Энэ чиглэлийн дэвшилтэт технологиудыг нутагшуулахад бид хамтран ажиллахад бэлэн байна” гэв.  
         Мөн уулзалтын үеэр Унгар улсын Секешфехервар хотын даргыг энэ оны Эрдэнэт хотын өдрөөр манай аймагт зочилохыг урьж, урилгыг элчин сайдад гардуулан өглөө. 

Мэдээллийн төв