Иргэдийг Тарлан толгойд мод тарихыг уриаллаа

“Тэр бум мод үндэсний хөдөлгөөн”, "Ногооон Эрдэнэт" хөтөлбөрийн хүрээнд  2021 оноос хойш Орхон аймаг 1 сая 600 мянган ширхэг мод тариад байна.  Үүнээс 2022 онд 1 сая 234 мянган  ширхэг мод, 2023 оны хаврын мод тарилтаар 386 мянган ширхэг модыг  15 байршилд олон нийтийн оролцоотой тарьжээ.  Намрын бүх нийтийн мод тарилтаар 15 байршлын   75 га талбайд 196 мянган ширхэг мод тарина гэж аймгийн БОАЖ-ын газраас мэдээллээ.

Иргэд олон нийтийг энэ сарын 15-ныг хүртэл  Тарлан толгойн таримал ойн төгөлд  /Цэцэрлэгт хүрээлэнгийн урд талын энгэр/ мод тарихыг уриаллаа. Төрийн албан хаагчид төлөвлөгөөний дагуу энэ сарын 12,13-ны өдрүүдэд Тарлан толгойд мод тарина. 

 Бүх нийтийн намрын мод тарилттай холбоотойгоор А.Амарын талбайд 15-ныг хүртэл тарьц суулгацын үзэсгэлэн худалдаа өнөөдрөөс гарч эхэлсэн.  2021 оноос хойш олон нийтийн оролцоотой 12  байршилд 33 мянга 4886 ширхэг мод тарьжээ.  Тарьсан модны  ургалт 70.25 хувьтай байна.
Тодруулбал, Баян-Өндөр уулын Хүрэнбулагийн амын “Гэр бүлийн ойн төгөл”-д тарьсан модны ургалт 95 хувьтай, Сархиа уулын энгэрт тарьсан модны ургалт  61 хувьтай,   Хэлмэгдэгсдийн ойн төгөлд тарьсан модны ургалтын хувь бага байгаа талаар мэдээлэв. 

Аймгийн БОАЖ-ын газрын дарга С.Жаргалсайхан “Мэргэжлийн байгууллагуудын оролцоотой, Байгаль орчны менежментийн төлөвлөгөөтэй ААНБ-уудын  тарьсан модны ургалт сайн байна. Олон нийтийн оролцоотой тарьсан модны ургалт хангалтгүй  байна.  Энэ нь арчилгаа усалгаатай холбоотой. Тариад орхих биш тарьсан модоо ургуулахад иргэн, байгууллага бүр анхаарч тарьсан модоо эргэж, арчилдаг байх нь зүйтэй.  

Бүх нийтийн хаврын тарьсан модны ургалтыг намар нь, намрын бүх нийтээр тарьсан модны ургалтыг хавар нь тоолдог. Ургалт нь  муу хэсэгт мэргэжлийн байгууллага нөхөн тарилтыг хийж байна” гэлээ.  Мөн тэрээр, ирэх жилээс нэрэмжит төгөлүүдийг хариуцуулах эзэнтэй болгох арга хэлбэр рүү орно. 2024 оны төсөвт  өндөр настнуудад цалин, урамшууллыг нь олгож нэрэмжит ойн төгөлүүдийг хариуцуулах талаар анхаарч байна гэлээ.