Гудамж,зам талбайг нэрэмжит болгох, хаягжуулах саналыг боловсруулах ажлын хэсэг хуралдав

Гудамж,зам талбайг нэрэмжит болгох,  хаягжуулах саналыг боловсруулах ажлын хэсэг хуралдлаа. Хурлаар “Эрдэнэт үйлдвэр” ТӨҮГ, Онцгой байдлын газраас ирүүлсэн саналыг хэлэлцэв. “Эрдэнэт үйлдвэр” ТӨҮГ-аас үйлдвэрийн бүс орчмын  гудамжинд нэр өгөх 22 нэрний саналыг ирүүлжээ.

Ажлын хэсэг  тус 22 нэрийг дахин эргэн харах шаардлагатай гэж үзэв. Тодруулбал, нэр давхцах магадлалтай, зарим гадаад үг хэллэгийг монгол нэршилд хөрвүүлэх шаардлагатай гэж үзлээ.

Харин Онцгой байдлын газраас ирүүлсэн саналыг дэмжив.  Эрдэнэ багт Онцгой байдлын салбар анги бий. Тус ангийн урд талын гудам буюу Дуурга дэлгүүрээс Петровис шатахуун түгээх колонк хүртэлх   хэсгийг Аврагчдын гудамж гэж нэрлэх тухай саналыг дэмжиж, Баян-Өндөр сумын ИТХ-д хүргүүлэхээр болов.

2022 онд улсын хэмжээнд хаягжуулалтын пайзны стандартыг шинэчилсэн. Үүнтэй холбоотойгоор хаягжуулалтын пайз солих шаардлагатай тул судалгаа, тооцоог гаргах, гудамж талбайн нэршилтэй холбоотой асууудлаар  иргэдийн дунд санал асуулга явуулахаар шийдвэрлэв.

Өнөөдрийн байдлаар аймгийн хэмжээнд 50 орчим гудамж талбай нэршилгүй байгаа аж. Нэр өгөх асуудлыг иргэн, ТББ, ААНБ-аас ирүүлсэн санал хүсэлт дээр тулгуурлан хэлэлцэж, шийдвэрлэх ёстой гэсэн хууль, журамд заасан байдаг ажээ.