Орхон аймагт шилжин ирсэн багш нарын төлөөллийг хүлээн авч уулзлаа

Дэлхийн багш нарын 29, Монголын багш нарын 57 дахь  өдрийг тохиолдуулан Орхон аймагт  нийслэл, 21 аймгаас шилжин ирсэн, шинэ залуу багш нарынхаа төлөөллийг  гавьяат багш нарын хамтаар аймгийн удирдлагууд хүлээн авч уулзлаа. 

Засгийн газраас хэрэгжүүлж  буй “Алсын хараа -2050”, “Шинэ сэргэлтийн бодлого”, Хот хөдөөгийн сэргэлтийн  хэрэгжилтийг хангаж Орхон “Хамтдаа Эрдэнэтэд хөгжье” хөтөлбөрийг аймгийн ИТХ-ын хуралдаанаар батлуулан олон талт арга хэмжээг  хэрэгжүүлж буй. 

Тухайлбал, өнгөрсөн тавдугаар сард МУБИС-ийн төгсөх дамжааны оюутнуудын дунд “Хамтдаа Эрдэнэтэд хөгжье” өдөрлөгийг зохион байгуулж, Орхон аймагт ажиллаж хөдөлмөрлөхийн онцлог давуу талыг сурталчилсан билээ.  Үүний үр дүнд 44 шинэ залуу боловсон хүчин Орхон аймгаас  ажил хөдөлмөрийн  гараагаа эхлүүлж байна. 

Мөн нийслэл хотоос 18, орон нутгаас 44 багш нийт 106 багш энэ оны найман сарын байдлаар Орхон аймаг, Эрдэнэт хотод шилжин ирж,   аймгийн хэмжээнд дутагдалтай байсан багшлах боловсон хүчний 80 хувийг бүрдүүлээд байна. 

Засаг дарга С.Батжаргал “Хамтдаа Эрдэнэтэд хөгжхөөр ирсэн Та бүхэнд баярлалаа. Монгол Улсын Засгийн газар, аймаг орон нутгаас хэрэгжүүлж буй хот хөдөөгийн тэнцвэрт хөгжлийг хангах бодлогын хэрэгжүүлэх үйл ажиллагаанд болон орон нутгийн боловсролын салбар болон Орхон аймаг, Эрдэнэт хотыг цаашдын хөгжилд хувь нэмрээ оруулахаар хүрэлцэн ирсэн та бүхэнд аймгийн төр захиргааны байгууллагын нэрийн өмнөөс талархал илэрхийлье.
Сургууль, цэцэрлэгийн менежментийг боловсронгуй болгох, боловсролын үйлчилгээний хүртээмж, чанарт ахиц гаргах, сургалтын орчин нөхцлийг сайжруулах зэрэг томоохон зорилго, зорилтуудыг дэвшүүлсэн  шинэ хичээлийн жилд та бүхнийг амжилт гаргаж ажиллана гэдэгт итгэлтэй байна” гэлээ. 

Орхон аймаг Эрдэнэт хот нь багш нараа хөгжүүлэх, мэргэшүүлэх, нийгмийн асуудлыг нь шийдвэрлэж, 1600 гаруй багшид бодит үр дүнгээ өгсөн "Багш" хөтөлбөрийг 10 дахь жилдээ хэрэгжүүлж байна.
Мөн эх хэлний мэдлэг, боловсролыг дээшлүүлэх “Эх хэл Эрдэнэт” хөтөлбөр, хөгжлийн бэрхшээлтэй хүүхдүүдийн боловсролд тэгш хамруулах “Тэгш боломж” төсөл,  сурагчдад эрүүл мэндийн боловсролыг шинэлэг хэлбэрээр олгох “Эрүүл хүүхэд“ төсөл, сурагчдад урлаг боловсрол, гоо зүй, технологи, амьдрах ухааны боловсрол олгох “Хүүхдийн хөгжил” зэрэг төсөл, хөтөлбөрүүдийг орон нутгийн санхүүжилтээр хэрэгжүүлж  байгаа билээ.  Түүнчлэн боловсролын салбарт хийх хөрөнгө оруулалтаа жил бүр нэмэгдүүлэхэд анхаарч 2021 онд 1.1тэрбум, 2022 онд  1.2 тэрбум, 2023 онд 3. 3 тэрбум төгрөгийг засвар үйлчилгээ, тохижилтод зарцуулсан.