Эрүүл мэндийн салбарын эмч, ажилтныг дэмжих зөвлөлийн хурал боллоо

Эрүүл мэндийн салбарын эмч, ажилтныг дэмжих зөвлөлийн хурал боллоо. Хурлаар “Эмч” хөтөлбөрийн хүрээнд эрүүл мэндийн салбарын ажилтнуудад дэмжлэг үзүүлэх тухай асуудлыг хэлэлцэв. 

Эрүүл мэндийн байгууллагын ажилтнуудаас 45 хүн дэмжлэг хүсч материал ирүүлжээ. Тэдгээрийг хэлэлцэж, “Эрүүл мэндийн салбарын ажилтнуудад дэмжлэг үзүүлэх” журамд заасан шаардлага хангасан 42 эрүүл мэндийн байгууллагын ажилтанд дэмжлэг үзүүлэхээр зөвлөлийн гишүүд шийдвэрлэлээ.  Тодруулбал, эмчилгээ, оношилгооны дэмжлэг 13, дотоод сургалтыг дэмжлэг 24, БОЭТ-ийн дэргэдэх сургалтын албанд Яаралтай тусламжийн сувилахуйн чиглэлээр суралцах 5, гадаад сургалт 3 дэмжлэг хүссэн материалыг хэлэлцэв. 

Орхон аймаг аймгийн ИТХ-аар “Эмч хөтөлбөр”-ийг батлуулж,  2017 оноос хойш зургаа дахь жилдээ хэрэгжүүлж байна.  Аймгийн эрүүл мэндийн салбарт ажиллаж буй эмч нарын мэдлэг ур чадвар, ёс зүйн төлөвшлийг сайжруулах,  гадаад харилцааг нээлттэй төвшинд хүргэх, шинэ технологи арга барилыг орон нутагт нутагшуулах, нийгмийн асуудлыг дэмжих, хүний нөөцийн тогтвортой байдлыг хангах нь хөтөлбөрийн зорилго юм. 

Хөтөлбөрийн 5.2 дахь заалтыг хэрэгжүүлж, аймгийн эрүүл мэндийн салбарын мэргэжилтэн, эмч, сувилагч, эмнэлгийн тусгай мэргэжилтэн, эм зүйч, эм найруулагч, эмнэлгийн ажилтнуудад жил бүр дэмжлэг үзүүлж байна.