Нийслэл, 21 аймгийн ТАЗ-ийн Нарийн бичгийн дарга нар Орхон аймагт туршлага судалж байна

УИХ-ын Ёс зүй, сахилга хариуцлагын байнгын хороо, ЗГХЭГ, Төрийн албаны зөвлөлтэй хамтран Орхон аймагт “Төрийн албан хаагчийн ёс зүй, гүйцэтгэлийн удирдлага” сэдэвт хоёр өдрийн сургалтыг зохион байгуулж байна. 

 Энэхүү сургалтын зорилго нь төрийн албан хаагчийн ёс зүй, манлайлал, гүйцэтгэл, үр дүн, төрийн байгууллагын бүтээмжийг дэмжих юм.   Сургалтад нийслэл, 21 аймгийн Төрийн албаны салбар зөвлөлийн Нарийн бичгийн дарга нар оролцож буй.  Сургалтын эхэнд Засаг дарга С.Батжаргал оролцогч нарт   хандан мэнчдилгээ дэвшүүлж, сургалтын үйл ажиллагаанд амжилт хүслээ. 

Төрийн албаны зөвлөлийн гишүүн Д.Баатарсайхан оролцогч нарт хандаж үг  хэлэв. Тэрээр,  “Төрийн албыг залгуулдаг,  төрийн албаны хамгийн нарийн чимхлүүр хариуцлагатай ажлыг эрхэлдэг Та бүхныг Орхон аймаг, Эрдэнэт хотод хүрэлцэн ирсэнд талархаж байна.  Хоёр өдрийн хугацаанд Орхон аймагтай танилцаж, туршлага судалж, харилцан мэдээлэл сонсох нь цаг үеэ олсон ажил юм. Орон нутагт Төрийн албаны салбар зөвлөлийнхөн цугларч байсан удаа үгүй билээ.  Анх удаа Орхон аймгийн удирдлагууд Та бүхнийг урьж аймаг орон нутаг, төрийн албаныхаа үйл ажиллагааг сурталчилж, таниулж хамтран ажиллах боломжийг олгож байна.  Төрийн албыг бэхжүүлэх үйл ажиллагаандаа олж харсан, сурч мэдсэн зүйлсээ ашиглана гэдэгт итгэлтэй байна” гэлээ. 

Орхон аймаг Засгийн газрын бодлого үйл ажиллагааг орон нутагтаа амжилттай хэрэгжүүлж,  цахимжуулалтаар 21 аймгаа  манлайлан ажиллаж буй. Тиймээс оролцогч нарт цахимжуулатын талаар хийж хэрэгжүүлж буй ажлынхаа талаар товч танилцууллаа.  Үүний дараа Цахим төв, Төрийн архив, Төрийн албан хаагчийн сургалтын танхим, Мэдээлэл шуурхай удирдлагын төв, төрийн үйлчилгээний анхан шатны нэгж Яргуйт, Эрдэнэ багийн үйл ажиллагаатай танилцаж мэдээлэл солилцов. 

Мэдээллийн төв