Ерөнхий сайд Л.Оюун-Эрдэнэ орлогод нийцсэн орон сууц төслийн бүтээн байгуулалттай танилцлаа

Монгол Улсын Ерөнхий сайд Л.Оюун-Эрдэнэ өнөөдөр Орхон аймагт ажиллаж байна. Тэрээр,  "Орлогод нийцсэн орон сууц" төслийн хүрээнд орон нутгийн төсвийн хөрөнгө оруулалтаар хэрэгжүүлж буй Уртын гол багийн 260 айлын орон сууцны явцтай танилцлаа. Орхон аймаг “Орлогод нийцсэн орон сууц” төслийг гэр хорооллын Их залуу баг, Оюут баг, Цагаанчулуут баг зэрэг 9 байршилд хэрэгжүүлэхээр төлөвлөсөн. Энэхүү төслийн эхний ээлжийн бүтээн байгуулалт нь Уртын гол багт барьж буй 260 айлын 5 блок орон сууц юм.

Энэ үеэр Засаг дарга С.Батжаргал албаныханд Засгийн газрын бодлого үйл ажиллагааг аймаг  орон нутагтаа хэрэгжүүлж буй ажлын мэдээлэл болон дахин төлөвлөлт, улс болон орон нутгийн төсвийн хөрөнгө оруулалтаар хэрэгжүүлж буй  бүтээн байгуулалтын талаар мэдээлэл өглөө.

Тухайлбал, Эрдэнэт хотын бохирын гуравдугаар коллекторын бүтээн байгуулалтын ажлын явцыг Засаг дарга С.Батжаргал танилцуулсан.

Одоогоос хоёр жилийн өмнө буюу 2021 оны тавдугаар сард Ерөнхий сайд Орхон аймагт ажиллах үеэр орон нутгийн удирдлага, иргэдээс тавьсан санал, хүсэлтийг хүлээн авч шийдвэрлэснээр өнгөрсөн оны есдүгээр сард бохирын гуравдугаар коллекторын ажил нь эхэлсэн билээ.

Баян-Өндөр сумын Цагаанчулуут багийн Танил захын урд хэсгээс Эрдэнэтийн дулааны цахилгааны станц хүртэлх нийт 6.4 км ариутгах татуургын III коллекторын төв шугам татах ажил 50 хувьтай үргэлжилж байна.

Улсын төсвийн 19 тэрбум төгрөгийн хөрөнгө оруулалтаар 2022 онд эхэлсэн уг бүтээн байгуулалтыг  “Комфорт Импекс” ХХК түлхүүр гардуулах нөхцөлтэйгөөр гүйцэтгэж буй.

Энэхүү бүтээн байгуулалт нь ирээдүйд Орхон аймаг, Эрдэнэт хотыг зүүн урагшаа хөгжих боломж, нөхцөлийг бүрдүүлэх алсыг харсан бүтээн  байгуулалт юм. Мөн аймгийн ерөнхий болон хэсэгчилсэн төлөвлөлтөд тусгагдсан орон сууцны хорооллууд барилгажих боломж бүрдэнэ.

Өнөөдрийн  байдлаар Ф200-ф600 мм-ийн гол шугам 2.86 км, салбар шугам 2.55 км, 1500 мм-ийн 107 ширхэг худаг шугамын угсралт, дулаалга, нягтруулалт зэрэг үе шатны ажлуудыг хийж гүйцэтгэжээ.  

Ерөнхий сайдын ажлын бүрэлдэхүүнд ЗГХЭГ-ын дарга С.Амарсайхан, ЗГХЭГ-ын дэд дарга У.Бямбасүрэн Боловсролын сайд Л.Энх-Амгалан, Байгаль орчин аялал жуулчлалын сайд Б.Бат-Эрдэнэ, Сангийн дэд сайд С.Мөнгөнчимэг, Соёлын сайд Ч.Номин, Хөдөлмөр нийгмийн хамгааллын яамны дэд сайд С.Зулпхар, Хууль зүй дотоод хэргийн яамны дэд сайд Б.Солонгоо, УИХ-ын гишүүн Д.Батлут, Н.Алтанхуяг нар дагалдаж байна.

Мэдээллийн төв