Зэс фестивалийг Монгол Улсын аялал жуулчлалын брэнд арга хэмжээ болгон хөгжүүлнэ

Аймаг орон нутагтаа дотоодын аялал жуулчлалыг хөгжүүлж, уул уурхай салбараа сурталчлах зорилгоор анх удаа зохион байгуулж буй  "Зэс фестиваль" эвент арга хэмжээ уурхайчдын баярын жагсаалаар эхлэв. Нээлтийн арга хэмжээнд Байгаль орчин аялал жуулчлалын сайд  Б.Бат-Эрдэнэ, УИХ-ын гишүүн Д.Батлут, Засаг даргын орлогч А.Түвшинжаргал, “Эрдэнэт үйлдвэр” ТӨҮГ-ын Ерөнхий захирал Г.Ёндон нар оролцож, мэндчилгээ дэвшүүллээ.  

Мөн  “Эрдэнэт үйлдвэр” ТӨҮГ-ын Ерөнхий инженер Т.Батмөнх, “Ачит Ихт”, “Эрдмин”, “Зэс Эрдэнийн хувь”, “Гал сэнтий”, “Оюутолгой” компанийн удирдлагууд оролцов. 

Засаг даргын орлогч А.Түвшинжаргал “Энэхүү арга хэмжээг цаашид уламжлал болгон зохион байгуулж, орон нутгийн төдийгүй Монгол Улсад цаашлаад дэлхийд танигдсан эвент арга хэмжээ болгон хөгжүүлэхээр зорьж байна” гэж мэндчилгээндээ онцолсон. 

Монгол Улсын Засгийн газраас аялал жуулчлалын салбарыг эдийн засгийн тэргүүлэх эгнээнд авч үзэн 2023-2025 оныг “Монголд зочлох жил”-ээр зарласан.  Энэ хүрээнд Орхон аймаг аялал жуулчлалаа хөгжүүлэх, сурталчлах зорилгоор Эрдэнэт хотынхоо онцлогийг илэрхийлсэн “Зэс фестиваль” эвент арга хэмжээг зохион  байгуулж байгаа юм.

Орхон аймагт 5000 гаруй аж ахуйн нэгж үйл ажиллагаа явуулж байгаагаас  уул уурхайн чиглэлээр үйл ажиллагаа явуулдаг таван аж ахуйн нэгж бий.  Тэдгээрийн нэг Азидаа төдийгүй дэлхийд томоохонд тооцогддог “Эрдэнэт үйлдвэр” ТӨҮГ билээ. Тус үйлдвэр нь жилд 34 сая тонн хүдэр олборлон, 32.5 сая тонн хүдэр боловсруулж, 580 мянган тонн зэсийн баяжмал, 5 мянган тонн молибденийн баяжмал үйлдвэрлэж, улсын төсвийн орлогын 10.5 хувийг дангаараа бүрдүүлж  байна. 

Зэс боловсруулах үйлдвэрлэлээр улсдаа тэргүүлэгч, жилд 10 мянган тонн катодын зэсийг гидрометаллургийн аргаар ялгах хүчин чадалтай дэлхийн жишигт нийцсэн зэс үйлдвэрлэж буй “Ачит Ихт” ХХК,  Жилд 2.5 тонн цэвэр зэс үйлдвэрлэж зэс утас, цахилгааны утас үйлдвэрлэдэг Монгол-Америкийн хамтарсан “Эрдмин” ХХК,  Байгаль  орчинд ээлтэй гидрометаллургийн технологийг ашиглаж жилдээ 10 мянган тонн цэвэр катодын зэс боловсруулах хүчин чадалтай “Зэс-Эрдэнийн хувь”, “Гал сэнтий”ХХК зэрэг томоохон уул уурхайн үйлдвэрүүд үйл ажиллагаа явуулж байна. 

Хоёр өдөр үргэлжлэх энэхүү арга хэмжээгээр дээрх уул уурхайн үйлдвэрүүд иргэд олон нийтэд үйл ажиллагаагаа сурталчлахын зэрэгцээ иргэдийг үйлдвэртэйгээ танилцуулах аялалыг зохион байгуулах юм. 

Мэдээллийн төв 

0

1

0

0

0

0