Согтууруулах ундаа худалдах, түүгээр үйлчлэхэд бүрдүүлэх материал

ХХААХҮ-ийн сайдын 2023 оны А/419 дүгээр тушаалаар согтууруулах ундаа худалдах, үйчлэх тусгай зөвшөөрөл хүсэгч хуулийн этгээдэд тавигдах шаардлагыг баталсан. Согтууруулах ундаа худалдах, үйлчлэх тусгай зөвшөөрөл хүсэгчид дараах   шаардлага,  материалыг бүрдүүүлнэ. 

Үүнд: 

1.  Хяналт шалгалт хэрэгжүүлэх эрх бүхий байгууллагаас батлагдсан худалдаалах үйл ажиллагаа, хоол үйлдвэрлэлийн газрыг шалгах хяналтын хуудсаар дүгнэхэд бага эрсдэлтэй үнэлэгдэж, улсын байцаагчийн дүгнэлт гаргуулсан байх; 
2.  Теле, хяналтын системийн техникийн ерөнхий шаардлага МNS 6423 стандартад нийцсэн камерын системээр тоноглогдсон, камер /шөнийн цагаар зураг авдаг бичлэгийг 720 цагаас багагүй буюу 30 хоног хадгалдаг санах ойтой байх/ -ын байнгын ажиллагааг хангасан байх;
3.  Тусгай зөвшөөрөл эзэмшигч хуулийн этгээд нь ажилтнуудтай Хөдөлмөрийн тухай хуулийн дагуу гэрээ байгуулан, ажиллах хугацааны нийгмийн даатгалын шимтгэлийг төлөх бөгөөд ажилтныг тогтвор суурьшилтай ажиллах нөхцөлөөр хангах; 
4.  Ажилтан ажлын байранд, ажил үүргээ гүйцэтгэх явцдаа согтууруулах ундааг хэрэглэхгүй байх талаар байгууллагын дотоод журам, ажлын байрны тодорхойлолт хөдөлмөрийн гэрээнд тусгаж, хэрэгжүүлж ажиллах;
5. Тусгай зөвшөөрөл эзэмшигч хуулийн этгээд нь Засгийн газрын 2014 оны 157 дугаар тогтоолоор батлагдсан "Хүнсний чиглэлийн үйл ажиллагаа эрхлэгч дотоод хяналт хэрэгжүүлэгч үлгэрчилсэн журам"-ын дагуу өөрийн үйл ажиллагаандаа дотоод хяналтыг хэрэгжүүлдэг байх;
6.  Тусгай зөвшөөрөл эзэмшигч нь өөрт харьяалагдах эзэмшил газрынхаа 30-аас доошгүй хувьтай тэнцэх хэмжээний талбайд ногоон байгууламж, автомашины зогсоол төлөвлөж, бий болгосон байх; 
7.    Согтууруулах ундаагаар үйлчилж буй аж ахуйн нэгжүүд шөнийн цагаар үйлчилгээ явуулж байгаа барилга байгууламжийн 10 метрээс дээш зайд гадна гэрэлтүүлэг төхөөрөмжийг байршуулах ба гэрэлтүүлэг нь ойр орчимд байгаа эд зүйл харагдах, камерын бичлэгт орж байхаар гадаад орчны аюулгүй байдлыг хангасан байх.
8. Татварын бүртгэл, мэдээллийн нэгдсэн сан, цахим төлбөрийн баримтын системд холбогдсон, татварын байгууллагад хугацаа хэтэрсэн өргүй байх.

Тусгай зөвшөөрөл хүсэхэд аж ахуйн нэгжүүд https://e-business.mn/ системд тоон гарын үсгээр нэвтэрч дараах материалыг оруулна. 
Үүнд: 

• Тусгай зөвшөөрөл хүссэн албан бичиг /эрхлэх үйлчилгээний төрөл, оноосон нэр, байрлах хаяг, харилцах утсыг тодорхой дурдах/;
• Хуулийн этгээдийн Улсын бүртгэлийн гэрчилгээний хуулбар;
• Тухайн үйл ажиллагааг эрхлэх байранд хийгдсэн Онцгой байдлын газрын Галын дүгнэлт
• Цагдаагийн газраас хяналтын камерын шаардлага 30 хоног хангасан тухай тодорхойлолт
• Хяналт шалгалт хэрэгжүүлэх эрх бүхий байгууллагаас /Хүнс, хөдөө аж ахуйн газар/ тухайн үйлчилгээний чиглэлээр үйл ажиллагааг эрхлэх талаар гаргасан улсын байцаагчийн болон ажлын байрны дүгнэлт;   
• Хуульд тусгайлан заасан нөхцөл, шаардлага хангасныг нотолсон баримт бичиг /СХЗХ-ээс Тохирлын гэрчилгээ/