Засаг дарга С.Батжаргал бүтээн байгуулалтын зарим ажлын явцтай танилцлаа

Орон нутгийн төсвийн хөрөнгө оруулалтаар хийж буй зарим бүтээн байгуулалтын ажлын явцтай Засаг дарга С.Батжаргал тэргүүтэй албаны хүмүүс өнөөдөр газар дээр нь очиж танилцав. 

“Ирээдүй Одод”  сургуулийн байт харвааны спорт заал ашиглалтад ороход бэлэн болжээ 

Орон нутгийн төсвийн 850 сая төгрөгийн хөрөнгө оруулалтаар спортын төрөлжсөн сургалттай “Ирээдүй Одод” сургуулийн 8*36 хэмжээтэй байт харвааны  спорт заалны өргөтгөлийг шинээр ашиглалтад ороход бэлэн болжээ.  Мөн хуучин   заалны бетонон шалыг агч модон шалаар солих, инженерийн шугам сүлжээ зэрэг гурван багц ажлыг дээрх төсөвт өртөгт багтаан “Мээжин савдаг” ХХК хийж гүйцэтгэжээ. 

Тамирчид, сурагчдын бэлтгэл сургуулилтаа хийдэг байсан заал бетонон шалтайн улмаас бэртэж гэмтэх эрсдэлтэй байсан билээ. Спорт заалны шинэ өргөтгөлийн хамт  орон нутгийн төсвөөс санхүүжилтыг шийдвэрлэж  агч модон шалтай болгон, аюулгүй байдлыг нь хангалаа.

“Номын өргөө”-г арваннэгдүгээр сард ашиглалтад оруулахаар төлөвлөж байна 

Аймгийнхаа найман наснаас наян нас хүртэлх бүх иргэддээ болон Орхон аймагт зочилж ирсэн бүх хүнд зориулан 2021 онд “Номын өргөө”-ний барилгын ажлыг эхлүүлж байв. Өнөөдрийн байдлаар барилгын явц 90 гаруй хувьтай, гадна талбайг тохижолт 75 хувьтай үргэлжилж байна. 

Орон нутгийн төсвийн 4,6 тэрбум төгрөгийн санхүүжилтээр босч буй эл бүтээн байгуулалт нь орчин үеийн шийдэл бүхий өнгө төрхийг шингээсэн барилга юм. Гэрээгээр дуусах хугацаа энэ оны арванхоёрдугаар сар боловч гүйцэтгэгч “Шинжүү “ ХХК арваннэгдүгээр сард дуусгахаар төлөвлөж  буйгаа хэллээ.  Зоорийн давхартайгаа нийт дөрвөн давхар тус барилга нь давхар бүртээ уншлагын танхимтай,  хоёр, дөрөвдүгээр давхартаа хурал, уулзалт зохион байгуулах боломжтой том саруулхан заал байхаар төлөвлөсөн. Мөн нэгдүгээр давхарт зөвхөн хөгжлийн бэрхшээлтэй иргэдэд зориулсан уншлагын танхим, сургалт хөгжлийн төв зэрэг байх юм. 

Харин гуравдугаар давхарт АНУ-ын тухай төрөл бүрийн сэдвээр сонирхож буй хүмүүст мэдээлэл олж авахад нь тусалж дэмжих зорилгоор “Америкийн соёл мэдээллийн төв”-ийг байгуулна.   Тус өргөө ашиглалтад орсоноор 15 ажлын байр шинээр бий болно. 

“Эрдэнэт палас” төсөл 2025 оны нэгдүгээр улиралд дуусна 

Хот төлөвлөлтийн шаардлага хангахгүй барилгажсан хэсгийг дахин төлөвлөн барилгажуулах төслийн хүрээнд Уурхайчин баг Тамир зочид буудлын урд 1,3 га талбайд  хэрэгжиж буй  “Эрдэнэт палас” төслийн явцтай танилцав. Уг төслийн байршилд  газар эзэмшигчидтэй гурван талт гэрээ байгуулж нийт 118 нэгж талбарын газар чөлөөлөлтийг ажлыг  хийсэн. 
Худалдаа үйлчилгээний зориулалттай  өндөр зэрэглэлийн 16 давхар 150 айлын орон сууцны суурь хөрс бэлдэх ажил эхэлсэн байна. Уг төслийг  “Таван хан энержи” ХХК хэрэгжүүлж байгаа бөгөөд  2025 оны нэгдүгээр улиралд ашиглалтад оруулахаар зорьж байна. 

Мэдээллийн төв