Соёл урлагийн салбарын хамт олон шилдгүүдээ шалгарууллаа

Өнөөдөр Орхон аймгийн соёл урлагийн салбарын хамт олон “Соёл урлагийн ажилтны баяр”-аа тэмдэглэж, салбарын шилдгүүдээ шалгарууллаа. Баярын хурлын нээлтийн үйл ажиллагаанд аймгийн Засаг дарга С.Батжаргал, ЗДТГ-ын нийгмийн бодлогын хэлтсийн дарга А.Буман-Сор, Соёл урлагийн газрын дарга Уранчимэг, болон урлаг соёлын ахмад уран бүтээлчид, гавьяатууд уригдан оролцлоо. 
        Аймгийн Засаг дарга С.Батжаргал: “Энэ бол мөнгөөр үнэлж боломгүй үр дүн”
Аймгийн Засаг дарга С.Батжаргал баяр хүргэж мэндчилгээ дэвшүүлж хэлсэн үгэндээ “Цар тахлын нөхцөл байдал хүндэрч хөл хорио болж, бүх зүйл хязгаарлагдмал, хориотой байх үед иргэдийг соён гэрээрүүлэх, сэтгэл санааны дэмжлэг үзүүлэх, урлагаар дамжуулан тайвшрал олгох ажлыг уран бүтээлчид Та бүхэн амжилттай хийж гүйцэтгэсэн билээ. Энэ бол мөнгөөр үнэлж боломгүй үр дүн гарсан ажил байсан гэдгийг онцлов. 
Мөн ард иргэдээ соёлыг түгээж, түүчээ болж явах учиртай соёл урлагийн салбараа дэмжиж, хамтран ажилласаар ирсэн бөгөөд бид орон нутагтаа “Соёлыг түгээе” арга хэмжээг амжилттай өрнүүлсээр байгаа. Түүнчлэн сүүлийн хоёр жилийн хугацаанд урлагийн төрөлжсөн “Уран эгшиг” сургууль, “номын өргөө” байгуулах ажлыг эхлүүлж, “Аялгуу” соёлын төвийн барилгыг ашиглалтад оруулж, урлаг соёлын байгууллагын техник тоног төхөөрөмжид нийт 597 сая төгрөгийг зарцуулсан нь тус салбарт хийгдсэн томоохон бүтээн байгуулалтууд байсан  гэдгийг дурдлаа. 

         Соёл урлагийн газрын дарга А.Уранчимэг: Соёл урлагийн салбарын албан хаагчдын цалин 62,2 хувиар нэмэгдсэн байна
Байгуулагдаад хоёр жил болж буй аймгийн Соёл урлагийн газрын дарга энэ хугацаанд хийж гүйцэтгэсэн ажил, салбарын амжилт ололт, бодлогоо урлаг соёлын ажилтан, албан хаагчиддаа танилцуулсан юм. 
Тэрээр энэ оны эхний хагас жилийн байдлаар нийт 175 соёл урлагийн арга хэмжээ зохион байгуулж 152790 гаруй иргэдэд соёл урлагийн үйлчилгээ үзүүлээд байна.  Мөн Засгийн газрын тогтоолоор төрийн албан хаагчийн цалин хөлсний хэмжээ шинэчлэн батлагдаж соёл урлагийн салбарын албан хаагчдын цалин 62,2 хувиар нэмэгдсэн талаар мэдээллээ. 

          Соёлын тэргүүний ажилтан дөрвөөр нэмэгдэв
Нээлтийн үйл ажиллагааны дараа салбарын шилдгүүддээ шагналыг нь гардууллаа. Баярын өдөр Орхон аймгийн урлаг соёлын салбарт Соёлын тэргүүний ажилтан дөрвөөр нэмэгдэв. Ахмад уран бүтээлч А.Пунсалдулам, ХЗТ-ын жүжигчин Эрдэнэпүрэв, Эрдэнэдалай, Соёл урлагийн цогцолборын ажилтан М.Ганцэцэг нар Монгол Улсын Соёлын тэргүүний ажилтан цол тэмдэгээр энгэрээ мялаав. Түүнчлэн Засгийн газрын болон орон нутгийн шагналаар нийт 11 ажилтан албан хаагч шагнууллаа. 
Орхон аймагт нийт есөн байгууллагын 77 мэргэжлийн боловсон хүчин, 33 үйлчилгээний ажилтан нийт 110 албан хаагч соёл урлагийн үйлчилгээ үзүүлэн ажилладаг.  Тэд баярын энэ өдөр шилдгүүдээ шалгаруулав. Энэ жил 
-    Шилдэг уран бүтээлчээр “Эрдэнэт” дуу бүжгийн чуулгын хөгжимчин А.Дөвтсүрэн 
-    Шилдэг соёлын ажилтанаар Нийтийн номын сангийн ажилтан Д.Отгонцэцэг
-    Шилдэг үйлчилгээний ажилтнаар Баян-Өндөр хүүхэд залуучуудын соёлын төвийн ажилтан Д.Алтантуяа 
-    Шилдэг төрийн бус байгууллагаар “Open Mic”-ын хамт олон 
-    Шилдэг байгууллагаар “Хүүхэд Залуучуудын театр”-ын хамт олон тус тус шалгарлаа. 
Жил бүрийн есдүгээр сарын хоёр дахь долоо хоногт соёл урлагийн салбарын ажилтны баяр тохиодог бөгөөд энэ жил манай улс 30 дахь жилдээ тэмдэглэн өнгөрүүлж байна. 

Мэдээллийн төв