Эрдэнэт хотын Цэвэр агаар-үйл ажиллагааны төлөвлөгөөг 21 аймгийн төлөөлөлд танилцуулж, хэлэлцүүлэв

Агаарын чанарыг сайжруулахтай холбоотой мэдлэг, үйл ажиллагааг бэхжүүлэх төслийн оролцогч талуудын өргөтгөсөн хурал өнөөдөр Улаанбаатар хотод боллоо.  Хуралд Засаг даргын орлогч А.Түвшинжаргал болон бусад албаны хүмүүс оролцов.  

Өргөтгөсөн хуралд оролцож буй 21 аймгийн төлөөлөлд Эрдэнэт хотын Цэвэр агаар-үйл ажиллагааны төлөвлөгөөг танилцуулж, санал солилцсон юм. Тодруулбал, Азийн хөгжлийн банкнаас “Агаарын чанарыг сайжруулахтай холбоотой мэдлэг, үйл ажиллагааг бэхжүүлэх: ТА-9608” тоот төсөл Бангладеш, Виетнам, Филиппин, Пакистан , Монгол зэрэг  таван орны долоон хотод хэрэгжиж байгаагийн нэг нь Орхон аймаг,Эрдэнэт хот. 

Уг төсөл 2018 оноос Орхон аймагт хэрэгжиж, өнгөрсөн хугацаанд аймгийн агаарын чанарт нөлөөлж буй хүчин зүйлсийг тандах, шинжилгээ судалгааг хийсэн. Гурван жилийн хугацаанд хийсэн дээрх судалгааны үр дүнгээр агаарын чанарт гэр хороолол, автомашин, зам дэд бүтэцтэй холбоотой тоос шороо, жижиг оврын уурын зуух голчлон нөлөөлж байгааг тогтоосон билээ.

Төслийн гүйцэтгэгч байгууллагаар Англи улсын Ricardo-AEA limited компани ажиллаж байгаа бөгөөд судалгааны үр дүнг боловсруулж Агаарын чанарын загварчлалыг боловсруулсан.  Уг загварчлал, судалгааны үр дүнд үндэслэн Эрдэнэт хотын агаарын чанарыг сайжруулах, цэвэр агаарын төлөвлөгөөг боловсруулах ажлыг өнгөрсөн онд хийсэн. Өөрөөр хэлбэл, төслийн үр дүнд Орхон аймаг агаарын чанарыг сайжруулах бодлого үйл ажиллагааны төвшинд цэвэр агаарын төлөвлөгөөтэй болсныг ийн өнөөдөр танилцуулж, хэлэлцүүлэв.

Агаарын бохирдол ганцхан Улаанбаатар хотод тулгамдаад буй асуудал биш  юм.  Бусад аймаг, томоохон суурин газруудад ч өвлийн улиралд тулгамдаж буй асуудал болсон билээ. Өргөтгөсөн хуралдаанд оролцогч талууд өөрсдийн орон нутгийн онцлогт тохирсон шийдлийг олж харан, бодлого үйл ажиллагаандаа тусгах нь энэхүү хэлэлцүүлгийн бас нэгэн зорилго байв.

Мэдээллийн төв