МЭНДЧИЛГЭЭ: Хүүхэд багачууд, багш нартаа хичээлийн шинэ жилийн мэнд дэвшүүлье

Анги танхим, анд найзуудтайгаа уулзахаар сэтгэл догдлон хүлээж буй хүүхэд багачууд, сурагч оюутан дүү нар аа! алдрай бяцхан шавь нараа угтан авахаар бэлтгэж буй эрхэм багш сурган хүмүүжүүлэгчид ээ!, Хүндэт эцэг эхчүүд ээ Та бүхэнд 2023-2024 оны хичээлийн шинэ жилийн баярын мэндийг дэвшүүлье! 

Энэ хичээлийн жилд Орхон аймгийн төрийн болон хувийн өмчийн 24 сургуульд нийт 26000 орчим хүүхэд суралцахаас 2450 орчим нь нэгдүгээр ангид элсэн орж буй хүүхэд багачууд байна. Харин сургуулийн өмнөх боловсролын байгууллагат 8700 гаруй хүүхэд суралцах бөгөөд үүнээс цэцэрлэгт шинээр элсэн орж байгаа 2200 орчим хоёт настай хүүхдүүд байна. 

Орхон аймаг бүх шатны боловсролын байгууллагын багш суралцагчдын сурч хөгжих орчныг сайжруулж, иргэдэд үзүүлэх боловсролын үйлчилгээг тэгш хүртээмжтэйгээр зохион байгуулж, сургалтын чанарыг нэмэгдүүлэх зорилгоор улсын болон орон нутгийн төсвийн хөрөнгө оруулалтаар томоохон бүтээн байгуулалт, төсөл хөтөлбөрүүдийг хэрэгжүүлж байна.

Бид энэ онд нийт 20,9 тэрбум төгрөгийн хөрөнгө оруулалт бүтээн байгуулалтын ажлыг хийсэн нь өмнөх жилүүдээс даруй нэг дахин их хөрөнгө оруулалт байж чадлаа. 

Боловсрол бол хувь хүний хөгжил, гэр бүлийн амьдралын баталгаа, улс орны хөгжлийн суурь нь юм. Орхон аймаг хүн бүрийг чанартай боловсрол эзэмшүүлэх эрх тэгш боломж бүрдүүлж, тэгш хамруулах зорилтын хүрээнд төсөл хөтөлбөрүүдийг амжилттай хэрэгжүүлж байна.  Энэ онд Багш хөтөлбөрийн хүрээнд ЭЕШ-д сурагчдаа амжилттай бэлтгэсэн 8 багшийг 4.0 сая төгрөгөөр урамшуулсан. Түүнчлэн Улаанбаатар хот болон Япон, Холбооны Бүгд Найрамдах Герман улсад сургалтад хамрагдах, тэмцээн уралдаанд оролцох багш ажилтнуудад нийт 15,4 сая төгрөгийн дэмжлэг үзүүлээд байна. 

Нийт сургууль, цэцэрлэгийн багш, ажилтнууд та бүхнээсээ хичээл сургалт болон хүүхдийг хөгжүүлэх, төлөвшүүлэх үйл ажиллагаандаа улам их амжилт гаргаж ажиллахыг хүсье. Багшийн заасан эрдэм бүрийг хичээнгүйлэн сурч, эцэг эхийнхээ зөвлөгөөг дагаж, эх орондоо хайртай, олноо хүндэлсэн, эрүүл чийрэг иргэн болон төлөвшихийг нийт хүүхэд багачууддаа захья.

Багшаа дэмжиж, хамтран ажиллахад эцэг эхийн оролцоо нэн чухал билээ. Багшийн ажил хөдөлмөрийг хүндэтгэж, хариуцлагатай ээж аав байхыг хүсье. 
Та бүхэнд дахин хичээлийн шинэ жилийн баярын мэндийг хувиасаа болон нийт нутгийн удирдлагын хамт олны нэрийн өмнөөс хүргэн мэндчилье! 

Эрхэм баян эрдэм ном дэлгэрэх болтугай

Орхон аймгийн Засаг дарга бөгөөд Эрдэнэт хотын захирагч С.Батжаргал