“Ногоон хөгжлийн сэргэлт” салбар дундын уулзалт болов

Байгаль орчин, Аялал жуулчлалын сайд Б.Бат-Эрдэнэ өнөөдөр Орхон аймагт ажиллаж “Ногоон хөгжлийн сэргэлт” салбар дундын уулзалтыг зохион байгууллаа. 
Монгол Улсын Засгийн газраас хэрэгжүүлж буй Шинэ сэргэлтийн бодлого - Ногоон хөгжлийн сэргэлтийн хүрээнд тус уулзалтыг хийж буй ажээ. Уулзалтад Ойн газрын дарга Б.Оюунсанаа, Усны газрын дарга З.Батбаяр, аймгийн Засаг даргын орлогч А.Түвшинжаргал болон салбарын 400 гаруй төлөөлөл оролцов. 
      Ногоон хөгжлийн сэргэлтэд нөлөөлөх гол хүчин зүйл нь мод тарих. Орхон аймаг сүүлийн жилүүдэд мод тарих ажлыг эрчимжүүлж, тарьсан модоо арчилж хамгаалдаг байх үүднээс ойн төглүүдийг байгуулж байгаа. Энэ намрын тарилтаар  Баян-Өндөр уулын энгэрт олон улсын байгууллагатай хамтран 10га талбайд ойн нөхөн сэргээлт хийх талаар аймгийн Засаг даргын орлогч А.Түвшинжаргал онцоллоо. 
      Салбарын төлөөллүүд уулзалтын үеэр гол усны ай сав, булаг рашааны эх, ойн хамгаалалт, нөөц бүрдүүлэлт зэргийн талаар хөндөн ярьж байв. Мөн салбарын ажилчдын нийгмийн асуудал, зарим хуулинд шинэчлэлт хийх талаар саналаа илэрхийллээ. 
Сэлэнгэ голын сав газраас “Эрдэнэт гол болон Говил голын урсацыг сэргээхээр санаачлан Дэлхийн банкны санхүүжилттэй төсөлд хамрагдах боломж бүрдсэн талаар мэдээлэл хийв. Мөн УЦУОШГ-ын зүгээс ажлын байрны орчин нөхцлийг сайжруулахад дэмжлэг үзүүлэх, салбарын хуулийн шинэчлэлийг анхаарч авч үзэх санал хэлж байлаа. 
        Орхон аймгийн иргэд нэг өдөрт нийт 2,9 сая метр куб цэвэр ус хэрэглэдэг. Усны хяналтгүй хэрэглээ, ИШС-н элэгдэл зэргээс шалтгаалан усны алдагдал ихээр үүсдэг. 2016 онд жилд 2,8 сая шоо метр усны алдагдалтай байсан бол 1,5 сая шоо метр болгож бууруулаад байгаа ажээ. 

Мэдээллийн төв