Сургууль, цэцэрлэгүүдэд сургалтын хэрэглэгдэхүүн, техник хэрэгсэл, тоног төхөөрөмжийг хүлээлгэн өглөө

2023-2024 оны хичээлийн шинэ жилийн босгон дээр улс болон орон нутгийн хөрөнгө оруулалтаар  нийлүүлж буй сургалтын хэрэглэгдэхүүн, техник хэрэгсэл, тоног төхөөрөмжийг ерөнхий боловсролын сургууль, цэцэрлэгийн удирдлагууд, эцэг эх,  сурагчдын төлөөлөлд хүлээлгэн өглөө. Арга хэмжээнд Засаг дарга С.Батжаргал, Засаг даргын орлогч А.Түвшинжаргал, аймгийн БШУГ-ын дарга О.Ариунгэрэлт болон бусад албаны хүмүүс оролцов. 

   Засаг дарга С.Батжаргал “Өнгөрсөн 3 жилийн хугацаанд боловсролын чанар, хүртээмжийг нэмэгдүүлэхэд онцгойлон анхаарч улс болон орон нутгийн төсвийн 40 гаруй тэрбум төгрөгийн хөрөнгө оруулалтыг аймгийнхаа боловсролын салбарт хийсэн байна.  Энэ онд Орхон аймаг боловсролын салбартаа улс болон орон нутгийн төсвийн 20.9 тэрбум төгрөгөөр  хөрөнгө оруулалт, бүтээн байгуулалтын ажлыг хийгээд байна. Аймаг, орон нутгаас хийж буй  эдгээр хөрөнгө оруулалтууд нь бүгд багш, сурагчдаа дэмжсэн, тэдний ажиллах, суралцах орчин нөхцлийг сайжруулж, боловсролын үйлчилгээний чанарыг дээшлүүлэхэд чиглэж байна” гэлээ. 

2023 онд боловсролын салбарт 20.9 тэрбум төгрөгийн хөрөнгө оруулалт хийснээс барилга байгууламжид 11 тэрбум, засвар үйлчилгээнд 3.4 тэрбум, техник, хэрэгсэл, тоног төхөөрөмж сургалтын хэрэглэгдэхүүнд 4.1 тэрбум төгрөгийн хөрөнгө оруулалтыг тус тус хийжээ. 

2023 оны боловсролын салбарын хөрөнгө оруулалтаас онцолбол...

• Сургалтын орчин нөхцлийг сайжруулах чиглэлээр орон нутгийн төсвийн 2.2 тэрбум төгрөгийн хөрөнгө оруулалтаар ерөнхий боловсролын сургуулиудын ширээ сандлыг шинэчилсэн.  Ингэснээр нийт сурагчдын 92 хувь буюу 22018 сурагч стандартад нийцсэн шинэ ширээ сандалтай хичээлийн шинэ жилээ эхлүүлэх гэж байна.

Орхон аймгийн ЗДТГ-аас “Хүүхдийн хөгжил”, ”Эрүүл хүүхэд”, “Тэгш боломж” зэрэг төслийг боловсролын салбартаа хэрэгжүүлж буй. Төслийн хүрээнд ерөнхий боловсролын сургууль, сургуулийн өмнөх боловсролын байгууллагуудад нийт 4 тэрбум 154 сая төгрөгийн техник хэрэгсэл, тоног төхөөрөмжийн хөрөнгө оруулалтыг хийжээ. 
Тухайлбал, хөгжлийн бэрхшээлтэй хүүхдүүдийг боловсролд, тэгш хамруулах зорилгоор хэрэгжүүлж буй “Тэгш боломж” төслийн хүрээнд  II  сургуульд  44 сая 770 мянган төгрөг,  13 дугаар сургуульд  46 сая 502 мянган төгрөг, 15 дугаар сургуульд  46 сая 502 мянган төгрөгийн техник хэрэгсэл, тоног төхөөрөмжөөр тус тус  хангасан байна. 

“Хүүхдийн хөгжил” төслийн хүрээнд Жаргалант, Баян-Өндөр сумын 20 гаруй ерөнхий боловсролын сургуулиудад сургалтын хэрэглэгдэхүүн техник тоног төхөөрөмжийг нийлүүлсэн. Тэдгээрээс онцолбол, I  сургуульд  12 сая 390 мянган төгрөгийн уран зохиол, биеийн тамир, биологийн хичээлийн судлагдахуун, VIII  сургуульд 11 сая 792 мянган төгрөгийн  график зургийн таблет, урлагийн төрөлжсөн сургалттай  “Уран эгшиг” сургуульд  7 сая төгрөгийн хөгжмийн зэмсэг, “Ирээдүй одод” сургуульд 7 сая 66 мянган төгрөгийн байт харвааны тоног төхөөрөмж,  Жаргалант сумын ерөнхий боловсролын сургуульд зураг дизайн, биеийн тамир, биологи, эмэгтэй техонологийн тэнхимд  23 сая 533 мянган төгрөгийн сургалтын хэрэгслийг тус тус олголоо. 

Ерөнхий боловсролын сургуулийн сурагчдад эрүүл мэндийн боловсролыг эгш, хүртээмжтэй олгох, эрүүл амьдралын хэв маягийг бий болгох зорилгоор “Эрүүл хүүхэд” төслийг хэрэгжүүлж буй. Төслийн хүрээнд 4, 15 дугаар сургуульд 490 сая төгрөгийн тоног төхөөрөмжийг нийлүүлсэн. Үүний үр дүнд 4-12 ангийн сурагчид эрүүл мэндийн хичээл дээрээ ашиглах сургалтын хэрэглэгдэхүүнтэй болж, 6-11 дүгээр ангийн сурагчид биологийн хичээл дээрээ хүний биеийн бүтэц, эрхтэн тогтолцооны талаарх мэдлэгийг өргөн хүрээнд авч байна. 

Боловсролын салбарын бүтээн байгуулалт...
Өнгөрсөн гурван  жилийн хугацаанд гурван  цэцэрлэгийн өргөтгөл,  хоёр  шинэ цэцэрлэгийн барилга, нэг  сургуулийн дотуур байр, нэг  сургуулийн өргөтгөлийг  ашиглалтад оруулсан. Өнөөдрийн байдлаар III дугаар сургуулийн 960 хүүхдийн суудалтай сургуулийн барилга, VIII сургуулийн 320 хүүхдийн суудалтай өргөтгөлийг барьж байна. 
Мөн Баян-Өндөр сум өөрийн хөрөнгө оруулалтаар Чандмань багт 150 хүүхдийн цэцэрлэг барьж буй. Сум өөрийн хөрөнгө оруулалтаар цэцэрлэг барьж буй хамгийн анхны тохиолдол Орхон аймгийн Баян-Өндөр сум болж байгаагаараа онцлогтой. 

“Уран эгшиг” сургуулийн өргөтгөл, “Ирээдүйн одод” сургуулийн спорт заалны өргөтгөл зэрэг  томоохон бүтээн байгуулалтын ажлуудыг улс болон орон нутгийн төсвийн хөрөнгө оруулалтаар  хийж байна. 

Аймгийн Засаг даргын 2020-2024 оны үйл ажиллагааны хөтөлбөрт тусгагдсаны дагуу багшийн хөгжлийг дэмжиж, сургалтад ашиглагдах шаардлагатай хэрэглэгдэхүүнээр хангах ажлыг БШУЯ-тай хамтран зохион байгуулж 2022 онд 1,8 тэрбум төгрөгийн хөрөнгө оруулалтаар сургуулийн өмнөх боловсролын байгууллагын багш нарт 425 ширхэг зөөврийн комьпютер, ерөнхий боловсролын сургуулийн багш нарт 1135 ширхэг таблетыг хүлээлгэн өгсөн. Энэ жилийн тухайд улсын төсвийн 1 тэрбум төгрөгийн хөрөнгө оруулалтаар сургалтад ашиглах  714 ширхэг хромобүүкийг багш нарт олгох ажил үргэлжилж байна.

Мэдээллийн төв