Шинээр баригдаж буй орон сууцны барилгуудад хийсэн шалгалтын дүнг танилцуулав

Засаг даргын зөвлөлийн XV хуралдаанаар Орхон аймагт баригдаж буй орон сууцны барилгуудад хийсэн төлөвлөгөөт бус шалгалтыг дүнг Хот байгуулалт, барилга захиалагчийн албанаас танилцуулсан юм. 

Тодруулбал, аймгийн Засаг дарга С.Батжаргалын санаачилгаар ажлын хэсэг байгуулагдаж шинээр баригдаж буй барилга байгууламжуудад холбогдох хууль дүрэм, журмыг хангаж ажиллаж буй эсэхэд төлөвлөгөөт бус хяналтыг энэ сарын 9,10-ны өдрүүдэд хийсэн. 

    Манай аймагт өнөөрийн байдлаар дөрвөн аж ахуйн нэгжийн 6 барилгын 326 айлын орон сууц ашиглалтад ороод байна. Одоогоор 23 аж ахуйн нэгж, иргэний 38 барилга 1991 айлын орон сууц баригдаж байна.   2023 онд цаашид шинээр нийт 2317 айлын орон сууц баригдаж байна гэх мэдээллийг ажлын хэсгээс өгсөн. 
Засаг даргын наймдугаар сарын 4-ны өдрийн А/592 тоот захирамжаар  байгуулагдсан ажлын хэсэг  Хот  байгуулалтын тухай хууль, Барилгын тухай хууль, Газрын тухай хууль, Бусад холбогдох норм, дүрэм, стандарт болон эрх зүйн баримт бичийн бүрдлийг хангуулах хүрээнд төлөвлөгөөт бус хяналтыг  2а, 7, 11 болон бусад байршлуудад баригдаж буй орон сууцуудыг хамруулан хийсэн байна. 

Ингэхдээ нийт 18 иргэн аж ахуйн нэгжийн 23 барилгад холбогдох хуулийн хэрэгжилт техникийн баримт бичиг болон барилга угсралтын явц чанарт үзлэг шалгалт хийжээ. 
Үзлэг шалгалтаар....

•  АТД, барилгын загвар зураг, батлагдсан зураг төсөл болон ажил эхлүүлэх зөвшөөрөлгүй ажил гүйцэтгэсэн, 
• Ажил гүйцэтгэх гэрээ  байгуулаагүй, барилга үйлдвэрлэлийн талбайд холбогдох барилгын баримт бичгийн бүрдэл хангалтгүй, 
• Барилгын батлагдсан зураг төслийг өөрчлөх гадна тохижилт фасад, ойр орчмын хотхон хорооллын төлөвлөлттэй уялдаагүй, барилга байгууламж хоорондын өндөржилтийн зөрүү үүссэн,
• улсын хэмжээний зам талбайн хамгаалалтын зурвас давж барилга барьсан гэхчлэн зөрчлүүд илэрчээ. 

Иймд иргэн, ААН-үүдэд ирэх сарын 10-ны дотор алдаа зөрчлөө арилгах хугацаатай албан бичиг хүргүүлж, хэрэгжилтийг холбогдох барилгын асуудал хариуцсан улсын байцаагч хянаж шалгах юм. Мөн цаашид барилгын ажил эхлүүлэх зөвшөөрөлгүй барилга байгууламжуудад хангагч байгууллагаас эрчим хүчний эх үүсвэрээр хангахгүй байх, орон сууц хотхон доторх зам талбайн ажлын зургийг батлуулах зэрэг үүрэг даалгаврыг өгсөн байна.

Түүнчлэн иргэд  шинээр баригдаж буй орон сууцуудад захиалга өгөхдөө  хуулийн хүрээнд заасан холбогдох бичиг баримтын бүрдэл, шаардлагатай зөвшөөрөл зэргийг лавлаж, танилцахыг мэргэжлийн байгууллагуудаас санууллаа.