Хөрөнгө санхүүгийн улмаас ажил нь зогссон зарим обьектуудад ажиллав

Улсын төсвийн хөрөнгө оруулалтаар баригдаж эхэлсэн ч хөрөнгө санхүүгийн улмаас ажил нь зогссон зарим барилга байгууламжийн нөхцөл байдалтай орон нутгийн удирдлагууд танилцаж холбогдох үүрэг даалгаврыг өглөө. 
       Тодруулбал: 2019 онд ажил нь эхэлсэн Баян-Өндөр сумын Наран багийн 250 хүний суудалтай соёлын төвийн барилгын санхүүжилт тавигдаагүйн улмаас сүүлийн гурван жил ажил нь зогссон байдалтай байна. Ажил зогссоноос үүдэж харуул хамгаалалтгүй орхигдож, барилгын цонх шилыг хагалах, эвдрэл гэмтэл үүсгэх эрсдэл нэмэгдсээр байгаа юм. Гүйцэтгэгч компаний хувьд төрийн байгууллагын шаардлагыг цаг хугацаанд нь гүйцэтгээгүй тул  гэрээг цуцлах саналыг соёлын яаманд хүргүүлээд байгаа ажээ. Орон нутгийн удирдлагуудын зүгээс тус обьектийг бүрэн дуусгахад  шаардагдах төсвийн тооцооллыг гаргаж, 2024 оны улсын төсөвт тусгахад анхаарч ажиллахыг Соёл урлагийн газарт даалгалаа. 
       Мөн Рашаант багийн 250 хүүхдийн хүчин чадалтай сургуулийн барилга, Хөдөө аж ахуйн МСҮТ-ийн байр, Говил багийн 250 хүүхдийн багтаамжтай сургууль, Баянбулаг багийн 16-р сургуулийн спорт заалны өргөтгөлийн барилга зэрэг оьектуудад ажиллав. Ажлаа бүрэн дуусгахгүйгээр зогссон байгаа компаниудын гэрээг цуцлах хүртэл арга хэмжээ авах, зарим барилгын зураг төсвийг дахин гаргах, одоо хийгдсэн байгаа ажлын гүйцэтгэл дээр нь аудитын шалгалт оруулж, дүгнэлт гаргуулах зэрэг үүрэг даалгаврыг өглөө. 

Мэдээллийн төв