Асфальтан замын 10,000 метр квадрат талбайд наймдугаар сард багтаан нөхөлт хийж дуусгана

Энэ онд аймгийн авто замын арчлалт, засварт орон нутгийн төсвөөс 500 сая төгрөгийг баталсан. Үүнд авто зам нөхөөс, явган хүний гарцын тэмдэг тэмдэглэгээ, авто замын хэвтээ босоо тэмдэг тэмдэглэгээ хийхээр төлөвлөж “Орхон АЗЗА” ТӨХК-тай хамтран ажиллах гэрээ байгуулан ажиллаж байна. 
      Өнөөдрийн байдлаар  орон сууцны хороолол дундах авто зам, Дэнж, Эрдэнэ, Их залуу багийн чиглэлийн нийт 1950 метр квадрат талбайд авто замын нөхөлт хийгээд байгаа юм. Мөн явган хүний  65 гарцын  тэмдэглэгээг хийхээс ажил 30 хувьтай үргэлжилж байна. Барилгачдын талбайгаас Сүмийн уулзвар хүртэлх 22.7 км хэвтээ тэмдэглэгээг шинээр хийжээ. Босоо тэмдэг дээр 125 тэмдэг угсрахаас  одоогийн байдлаар 40 хувьтай үргэлжилж  байна.
      Харин шинээр үүссэн эвдрэлүүдийг засварлах хөрөнгийн эх үүсвэрийг баяр наадмын өмнө төсвийн тодотгол хэлэлцэх үед аваарын зардал дээр  тусгасан. Энэ нь нийт 860 гаруй сая төгрөг юм.  Одоогийн байдлаар гэр хороолол болон орон сууцны хороолол доторх 3500 метр квадрат талбайн авто замын нөхөөсний ажил эхэлсэн байна. Мөн БОЭТ орчимд 2000 гаруй, Барилгачдын талбай орчимд 3500 гаруй , Үйлчилгээний төв орчимд 1100 метр квадрат талбайд тус тус нөхөөс хийнэ. Дээр нь нэмээд Жаргалант сумын  орон сууцны хороолол дотор гарсан 259 метр квадрат талбайн зэрэг нийт 10,000 гаруй метр квадрат талбайн эвдрэлийг  нөхөхөөр зураг төсөв тооцоог гаргаад байгаа ажээ. 
       Хуурай суурь бэлтгэн   асфальтан хучилт, нөхөөс хийх  авто замын ажлын технологи байдаг. Гүйцэт хатаагүй үед нөхөөс хийвэл буцаад хагарах эрсдэлтэй. Энэ жил өмнөх жилүүдээс хур бороо элбэгтэй байгаа учир ажил удаашралтай байгаа. Наймдугаар сард багтаан авто замын засвар үйлчилгээтэй холбоотой ажлыг дуусгах төлөвлөгөөтэй ажиллаж байгаа талаар ХЗА-аас мэдээллээ. 
Манай аймагт хатуу хучилттай 100 гаруй км  орон нутгийн чанартай авто зам бий. Үүний 40 гаруй хувь нь нэлээн хуучны авто зам байдаг ажээ. 

Мэдээллийн төв