Эхний ээлжинд ашиглалтад орж буй 77 байрны цахим бүртгэл даваа гаригт эхэлнэ

Уртын гол багт баригдаж буй 260  айлын орон сууцны  186 айлын орон сууцны байрыг иргэдэд худалдан борлуулж, орлогыг орон нутгийн төсөвт төвлөрүүлэх  аймгийн ИТХ-ын тогтоол 2022 оны арванхоёрдугаар сарын 02-ны өдөр гарсан. 

260 айлын орон сууцнаас  70 айлын орон сууцанд  гэр хорооллыг дахин төлөвлөн барилгажуулах төсөлд хамрагдсан айл өрхийг түр суурьшуулах бол нэг өрөө нэг байрыг дэлхийн шатрын аварга Б.Мөнгөнзулд, хоёр өрөө нэг байрыг Улсын начин Ө.Батзул нарт олгохоор уг тогтоолд тусгасан билээ. 
Иргэдэд худалдан борлуулах 186 айлын орон сууцнаас эхний ээлжийн хоёр блок буюу 104 айлын орон сууцанд  баяр наадмын өмнө буюу долоодугаар сарын 7-нд  улсын комисс ажилласан. 

Аймгийн ИТХ-ын тогтоолын хэрэгжилтийг хангаж одоо ашиглалтад орж орон сууцны байрнаас  нэг өрөө нэг байрыг дэлхийн шатрын аварга Б.Мөнгөнзулд, хоёр өрөө нэг байрыг Улсын начин Ө.Батзулд олгох бол 25 айлын орон сууцны  байрыг гэр хорооллын дахин төлөвлөн барилгажуулах төсөлд хамрагдсан айл өрхийг түр суурьшуулах юм.  Ингээд үлдсэн 77 айлын орон сууцыг иргэдэд 100 хувийн төлөлттэй нөхцөлөөр худалдан борлуулна. Уг асуудлаар өнөөдөр холбогдох албаны хүмүүс хэвлэлийн хурал хийж, иргэдэд мэдээлэл өглөө. 

“Орлогод нийцсэн орон сууц” төслийг анх удаа аймгийн ЗДТГ орон нутгийн төсвийн хөрөнгө оруулалт,  “Эрдэнэт үйлдвэр” ТӨҮГ-ын хамтын ажиллагааны хүрээнд  эхлүүлсэн.
Аймгийн ИТХ-ын 2022 оны арванхоёрдугаар сарын 22-ны өдрийн  тогтоолоор тус байрны нэг метр квадрат үнийг 1.952.798 /нэг сая есөн зуун тавин хоёр мянга долоон зуун ерэн найм/ төгрөг, нэг автомашины зогсоолыг 21 сая 380 мянган төгрөгөөр худалдан борлуулахаар шийдвэрлэсэн.  

Нэг орон сууцны байр 15 авто машины зогсоолтой бөгөөд ашиглалтад орж буй хоёр орон сууцны 30 авто машины зогсоолыг мөн адил 100 хувийн төлөлтөөр худалдан борлуулна. 

Эхний ээлжийн 77 байрыг  шаардлага хангасан иргэдэд 100 хувийн төлөлтөөр худалдан борлуулж байгаа нь үлдсэн гурван орон сууцны барилгыг энэ ондоо багтаан ашиглалтад оруулах төсөв санхүүг шийдвэрлэх юм. Учир нь  төрийн хэмнэлтийн тухай  хуультай холбоотойгоор орон нутгийн төсвөөс уг бүтээн байгуулалтыг санхүүжүүлэх боломжгүй болсонтой холбоотой.

Уг байрны бүртгэл ирэх даваа гариг буюу 2023 оны долоодугаар сарын  24-ний 09:00 цагт эхэлж 26-ний өдрийн 09:00 цагт хаагдах юм. Ингэхдээ ажлын хэсгээс олон нийтэд нээлттэй ил тод, шударга байх зарчмыг баримталж SMART ERDENET  гар утасны аппликейшн болон www.smarterdenet.mn  вэб сайтаар бүртгэлийг зохион байгуулна. Тодруулбал, Google form-оор асуулга тус бүрээр материалаа оруулна. 

Баримт материалын бүрдүүлэлтдээ хянамгай хандахыг ажлын хэсгээс анхаарууллаа. Дутуу мэдээлэл оруулсан бол нөхөж эсвэл засах боломжгүй гэлээ.  Мөн тухайн иргэний бүртгүүлсэн гар утасны дугаарт бүртгэл баталгаажсан эсэх зурвас очихын зэрэгцээ бүртгүүлсэн цаг, минут, секунт нь харагдана.  77 байр 100 хувь бэлэн мөнгөөр борлуулагдахгүй бол үлдсэн байруудыг ипотекийн зээлд хамруулах боломжтой гэж ажлын хэсгээс мэдээллээ. 

Иргэд орон сууц худалдан авах хүсэлтээ маягтын дагуу гаргана. 
Орон сууц байр худалдан авахад тавигдах шаардлага. 
•  Орон сууцны  байр худалдан авах хүсэлт гаргасан айл өрх нь улсаас орон сууцны байр хувьчилж аваагүй байх, 
•  Орон сууц худалдан авах хүсэлт гаргасан айл өрх нь өмнө нь төрөөс хөнгөлөлттэй нөхцөлөөр олгох түрээсийн болон бусад орон сууцны хөнгөлөлт эдлээгүй байх, 
•  Орон сууцны байр худалдан авах айл өрх нь өөрийн өмчлөлийн инженерийн шугам хангамжгүй байх  /Эрдэнэт-Ус ДТС ОНӨХК/-аас авна. 
•  Сүүлийн 5 жилд гэр хороололд амьдарсан  байх,
•   Худалдан борлуулах байрны төлбөрийг 100 хувь төлөх санхүүгийн эх үүсвэртэй байх
Орон сууцны байр худалдан авах айл өрхийн бүрдүүлэх бичиг баримт:
• Иргэний үнэмлэхний лавлагаа /ТҮЦ машинаас гэр бүлийн гишүүний хамт/
•  Оршин суугаа газрын лавлагаа /ТҮЦ машинаас гэр бүлийн гишүүний хамт/
• Ам бүлийн тодорхойлолт багаас /гэр бүлийн гишүүний хамт/
•  Гэрлэлтийн лавлагаа /ТҮЦ машинаас/
• Орлого тодорхойлох баримт бичиг /Нийгмийн даатгалын дэвтэр, тэтгэвэр, тэтгэмжийн дэвтэр, хувиараа хөдөлмөр эрхлэгч түрээслүүлэгчийн хувьд орлого нотлох баримт/ 
•  Нэг айл өрх нь нэг л орон сууцны байранд материалаа бүрдүүлж өгнө. 
•   Үл хөдлөх хөрөнгийн түүхчилсэн лавлагаа. /Улсын бүртгэлийн хэлтэс/