258 айлын орон сууцны эхний 77 байрыг 100 хувийн төлөлттэй нөхцөлөөр худалдан борлуулна

Уртын гол багт баригдаж буй 258  айлын орон сууцны  эхний ээлжинд ашиглалтад орж буй 77 байрыг шаардлага хангасан иргэдэд 100 хувийн төлөлттэй нөхцөлөөр худалдан борлуулах бэлтгэл ажлыг хангаж байна.  Аймгийн ИТХ-ын 2022 оны арванхоёрдугаар сарын 22-ны өдрийн  тогтоолоор тус байрны нэг метр квадрат үнийг 1.952.798 /нэг сая есөн зуун тавин хоёр мянга долоон зуун ерэн найм/ төгрөг байхаар тогтоосон. 

260 айлын орон сууцнаас нэг өрөө нэг байрыг дэлхийн шатрын аварга Б.Мөнгөнзулд, хоёр өрөө нэг байрыг Монгол Улсын начин Ө.Батзулд олгохоор шийдвэрлэж  186-г нь  иргэдэд худалдан борлуулах юм. Харин 70 айлын орон сууцыг гэр хорооллын дахин төлөвлөн барилгажуулах төсөлд хамрагдсан айл өрхийг түр суурьшуулах,  хоёр байрыг техникийн өрөөний зориулалтаар ашиглана.   Бүртгэлийг SMART ERDENET аппликейшнээр цахимаар зохион  байгуулах бөгөөд ажлын хэсгээс бүртгэл болон бусад асуудлаарх дэлгэрэнгүй мэдээллийг хэвлэлийн бага хурал хийж олон нийтэд мэдээлэл өгнө. 

Иргэд орон сууц худалдан авах хүсэлтээ аймгийн Засаг даргад гаргана. 
Орон сууц байр худалдан авахад тавигдах шаардлага. 
•    Орон сууцны  байр худалдан авах хүсэлт гаргасан айл өрх нь улсаас орон сууцны байр хувьчилж аваагүй байх, 
•    Орон сууц худалдан авах хүсэлт гаргасан айл өрх нь өмнө нь төрөөс хөнгөлөлттэй нөхцөлөөр олгох түрээсийн болон бусад орон сууцны хөнгөлөлт эдлээгүй байх, 
•    Орон сууцны байр худалдан авах айл өрх нь өөрийн өмчлөлийн инженерийн шугам хангамжгүй байх  /Эрдэнэт-Ус ДТС ОНӨХК/-аас авна. 
•    Сүүлийн 5 жилд гэр хороололд амьдарсан  байх,
•    Худалдан борлуулах байрны төлбөрийг 100 хувь төлөх санхүүгийн эх үүсвэртэй байх
Орон сууцны байр худалдан авах айл өрхийн бүрдүүлэх бичиг баримт:
•    Иргэний үнэмлэхний лавлагаа /ТҮЦ машинаас гэр бүлийн гишүүний хамт/
•    Оршин суугаа газрын лавлагаа /ТҮЦ машинаас гэр бүлийн гишүүний хамт/
•    Ам бүлийн тодорхойлолт багаас /гэр бүлийн гишүүний хамт/
•    Гэрлэлтийн лавлагаа /ТҮЦ машинаас/
•    Орлого тодорхойлох баримт бичиг /Нийгмийн даатгалын дэвтэр, тэтгэвэр, тэтгэмжийн дэвтэр, хувиараа хөдөлмөр эрхлэгч түрээслүүлэгчийн хувьд орлого нотлох баримт/ 
•    Нэг айл өрх нь нэг л орон сууцны байранд материалаа бүрдүүлж өгнө. 
•    Үл хөдлөх хөрөнгийн түүхчилсэн лавлагаа. /Улсын бүртгэлийн хэлтэс/