“Гахайн Африкийн мялзан” өвчин гарсантай холбоотойгоор 203 толгой гахайг устгалд оруулаад байна

Энэ сарын 12-нд Баян-Өдөр сумын Говил багийн  Бөхөнгийн  өврийн төвлөрсөн  хогийн цэгт  “Гахайн Африкийн мялзан” өвчин гарсан нь Улсын мал эмнэлгийн ариун цэврийн төв лабораторит шинжлүүлсэн шинжилгээгээр батлагдсан билээ. 

Өнөөдөр аймгийн Засаг даргын шуурхай зөвлөгөөнөөр Мал эмнэлгийн газрын дарга Л.Уртнаст авч хэрэгжүүлж буй арга хэмжээ, нөхцөл байдлын талаар мэдээлэл хийлээ.

“Гахайн Африкийн  мялзан” өвчин нь хавьтлын замаар халдварладаг, өндөр халуурал, цус төлжүүлэх эрхтний гэмтэл, уушиг, бүдүүн гэдэсний нэвчдэст үрэвслээр илэрдэг  малын гоц халдварт өвчин юм. Ахуй хавьтал, бохирлогдсон хүнсний бүтээгдэхүүн, гахайн тэжээлээр халдварладаг зэрлэг болон тэжээвэр гахай нас харгалзахгүй өвчилнө. Өвчилж эдгэрсэн гахай 3-10 сар өвчний тээгч болдог  байна. 

Дэлхий нийтэд одоогоор вакцин хэрэглээнд нэвтрээгүй. Өвчний үүсгэгч нь хлорформ болон хлор агуулсан бодисуудад идэвхээ алддаг.  Иймд иргэд болон гахайн аж ахуй эрхлэгчид, гахайн махны худалдаа эрхлэгчид, гахайн махаар хоол үйлдвэрлэл үйлчилгээ эрхлэгчид  ажлын байр, амьдрах орчиндоо  халдваргүйтгэл, ариутгал хийж байна. 

Голомтын цэгт байрших 6 өрхийн  196 толгой гахайг зориудын устгалд оруулж,  үхсэн 7  толгой гахай нийт 203 толгой гахайг устгалын нэгдсэн  цэгт  булшлан,  цэвэрлэж  устгалд оруулсан.
Мөн уг өвчин оношлогдсонтой холбогдуулан гахайн махаар үйлдвэрлэл үйлчилгээ худалдаа, үйлчилгээ явуулдаг ААН-үүдэд хяналт шалгалт хийсэн байна. 
Үүний хүрээнд,   энэ сарын 12,13-нд  таван  худалдааны төв,  гурван  иргэн, нэг аж ахуй нэгжээс гахайн махны 15 дээж авч, 1090 кг гахайн махыг битүүмжлэн шинжилгээний хариу гарах хүртэл хугацаанд худалдан борлуулахгүй байхыг зөвлөсөн.

Мөн гахайн махаар үйлдвэрлэл үйлчилгээ худалдаа, үйлчилгээ явуулдаг ААН, иргэдэд мэдээ мэдээлэл сэрэмжлүүлэг зөвлөмжийг өгөөд байна.
Зах зээлд нийлүүлэхээр нядалсан 4 гахайны махны шинжилгээний хариу Улсын Мал Эмнэлгийн ариун цэврийн төв лаборатороор батлагдаж эерэг гарсан тул устгалын ажлыг хийж гүйцэтгэсэн. 

•   Гахайн махны дээж - 7 иргэний 10 дээж,  2 ААН  - 3 дээж  нийт 13 дээж.
•   Жимсний дээж - 2 аж ахуй нэгжийн 5 дээж,  2 иргэний 10 дээж нийт 15 дээж 
• Гахайн цусны дээж – 11 дээж, 6 арчдас нийт 17 дээжийг илгээн хариу хүлээж  байна. 

2019 онд дээрх газарт уг өвчин оношлогдож  486 гахайг устгалд оруулж байсан билээ. Дэгдэлтийн  тандалт судалгааг хийж байна гэж Мал эмнэлгийн газраас мэдээллээ.