Засаг дарга С.Батжаргал баяр наадмын мэндчилгээ дэвшүүллээ

Эрхэм хүндэт наадамчид аа. 
Эрхэмсэг хатагтай ноёд, зочид, төлөөлөгчид өө. 
   Зууны манлай бүтээн байгуулалтын эзэд Эрдэнэтчүүд Та бүхэндээ үндэсний их баяр наадам, Монголын  Тулгар төрийн 2232, Их Монгол Улсын 817, Үндэсний эрх чөлөө, тусгаар тогтнолоо сэргээн мандуулсны 112, Ардын хувьсгалын 102 жилийн ой, Эрдэнэт хот байгуулагдсаны 47 жилийн ойн баяр наадмын мэндийг өргөн дэвшүүлье. 
Өвөг дээдсээсс өвлөгдсөн ирсэн үндэсний их баяр наадам бол Монгол төрийн оршин тогтнохуй, тусгаар тогтнолын бэлгэдэл, Монгол үндэстний эв нэгдэл эрх чөлөө, үүх түүх, үнэт зүйл, өв соёл, оюун санааны охь шим, хүн төрөлхтний соёлын үнэт өв билээ. 

Өнөөдөр Эрдэнэчүүд бид Эрдэнэт хот  байгуулагдсан цагаас хойшхи хийж бүтээснээрээ, ололт амжилтаараа, бүтээл туурвилаараа бахархан баяр наадмаа тэмдэглэж, ирээдүйд хийж амжуулах ажлаа төлөвлөж, азай буурал ахмадууд, илгээлтийн эзэд, анхдагчид, гадаад дотоодын эрхэм хүндэт зочид төлөөлөгчид, цог золбоот залуус, нялх, балчир үрс, үр хүүхдийн хамтаар өргөн дэлгэр наадхаар төв цэнгэлдэх хүрээлэндээ цуглараад байна. 

Эх орныхоо тусгаар тогтнол, эрх чөлөөг бататган бэхжүүлж, эвийн хүч шударга ёс, бүтээлч сэтгэлгээг эрхэмлэн дээдэлж, үндэсний түүх, эх хэл, соёл уламжлалаа нандигнан өвлөж, хөгжил дээшлийн төлөө хичээн зүтгэж буй хүн бүхэнд талархал илэрхийлье. 

Ажилч хичээнгүй иргэдийнхээ цаг наргүй хөдөлмөрийн үр шимээр Орхон аймаг, Эрдэнэт хот маань урагшлан дэвжиж байна.  Орхон аймаг, Эрдэнэт хот өөрийн онцлог давуу талаа Эрдэнэт хүн-Эрдэнэт хот-Эрдэнэт хүч гэх тулгуур үнэт зүйлээ тодорхойлон түүнийхээ төлөө Эрдэнэтчүүд бид бүхэн хамтран ажилласны үр дүнд 2022 оныхоо ажлаар улсын хэмжээнд тэргүүллээ. 

Ийнхүү улсын хэмжээнд ажлаараа 12 дахь удаа тэргүүн байранд шалгарахад аймгийн нийт иргэд, байгууллага, аж ахуйн нэгжүүд Та бүхний итгэл, сэтгэл, идэвхи санаачилга, бүтээлч хөдөлмөр ихээхэн үүрэг гүйцэтгэснийг наадмын энэ өглөө бахархан тэмдэглэхэд таатаай байна. 

Эрдэнэтчүүддээ баярлалаа. 

Өнөөдөр Эрдэнэтчүүд бид Эрдэнэт хот байгуулагдсан цагаас хойшхи хийж бүтээснээрээ, ололт амжилтаараа, бүтээл туурвилаараа бахархан наадна. 
Өнөөдөр азай буурал ахмадууд, их бүтээн байгуулалтын илгээлтийн эзэд,анхдагчдаа хүндэтгэж, тэднийхээ сургаалийг сонсч, халамж энэрэлээ үзүүлэн наадна.
Өнөөдөр Эрдэнэтчүүд бид цог золбоот залуус, нялх балчрынхаа ирээдүйд чиглэсэн бодлогоо хэрэгжүүлэн Орхон аймаг, Эрдэнэт хотоороо омогшиж наадна. 

Эр бяраараа эзэн нь байж,эрмэг хурдаараа эрэлхэг нь байж, эрхий мэргэнээрээ түрүүнд нь байж дэлгэр зуны налгар талдаа дэнж хотойтол сайхан наадаарай.