ИТХ-ын ээлжит бус XI хуралдаанаар 2023 оны төсвийн тодотголыг баталлаа

Аймгийн ИТХ-ын ээлжит бус XI хуралдаанаар 2023 оны тодотгосон төсвийн төслийг хэлэлцэж баталлаа. Төслийг Засаг дарга С.Батжаргал уншиж танилцуулав.  УИХ-ын хуралдаанаар улсын төсөвт тодотгол хийсэнтэй холбоотойгоор орон нутгийн төсөвт тодотгол хийх зайлшгүй шаардлага үүссэн билээ.  Улсын төсвийн тодотголоор аймгийн төсвөөс улсын төсөвт төвлөрүүлэх орлогыг 21 тэрбум 140 сая төгрөгөөр нэмэгдүүлснээр Орхон аймаг 2023 онд  164 тэрбум 107 сая төгрөгийг улсын төсөвт төвлөрүүлнэ.

2023 оны тодотгосон төсвийн төсөлд...

• Орон нутгийн төсвөөс санхүүждэг байгууллагуудын төрийн албан хаагчдын цалинг УИХ, Засгийн газрын шийдвэрийн дагуу нэмэгдүүлэх,
• 2023-2024 оны өвөлжилтийн бэлтгэл хангах ажлын хүрээнд зайлшгүй хийх ёстой ажлуудыг санхүүжүүлэх,
• 2023 онд дуусгаж ашиглалтад оруулах хөрөнгө оруулалтын ажлуудын дутуу зардлыг гүйцээн батлуулах,
• Хот тохижуулах газрын ажилчдын цалинг нэмэгдүүлэх,
• Иргэд олон нийтийн дунд зохион байгуулдаг урлаг соёл, биеийн тамир спортын арга хэмжээнд дэмжлэг үзүүлэх
• Ирэх оны төсөвт айл өрх бүрээс санал авах, эрүүл мэндийн үйлчилгээнд иргэдийг хамруулах ажлыг эрчимжүүлэх зэрэг  чиглэлээр тодотгосон төсвийн төслийг боловсруулсан байна.

Төрийн албан хаагчдын цалинг нэмэгдүүлэх Засгийн газрын шийдвэрийн дагуу орон нутгийн төсвөөс санхүүждэг байгууллагуудын төрийн албан хаагчдын цалинг Засгийн газрын  өнгөрсөн сарын 21-ний өдрийн 242 дугаар тогтоолоор баталсан шатлалын дагуу тооцож нэмэгдүүлэх, мөн Засгийн газрын 2022 оны арванхоёрдугаар сарын 28-ны өдрийн 489 дугаар тогтоолын холбогдох заалтыг үндэслэн орон нутгийн нэмэгдлийг тооцож олгоход нийт 3 тэрбум 485 сая төгрөгөөр төлөвлөжээ.

Үүний 1 тэрбум 894 сая төгрөг нь Хот тохижуулах газрын цалингийн нэмэгдэл болон бүтэц орон тоо, техник тоног төхөөрөмж нэмэгдсэнтэй холбоотой цалин шатахуун бусад холбогдох зардлын нэмэгдэл юм.

16 байгууллагын төрийн албан хаагчдад энэ сарын 1-ний өдрөөс олгох нэмэгдэлд 1 тэрбум 266 сая төгрөгийг тусгасан байна.  Ингэхдээ төрийн захиргааны болон боловсрол, эрүүл мэндийн салбараас бусад төрийн үйлчилгээний албан хаагчдын цалинг 40 хувиар нэмэгдүүллээ.

Өвөлжилтийн бэлтгэл ажлын хүрээнд зайлшгүй хийх шаардлагатай 17 дугаар сургуулийн халаалтын зуухыг шинэчлэх, 20 сургуулийн гадна суурилуулсан узельд барилга барих, Эко хорооллын дулаан хангамжийн шугам сүлжээг хэсэгчлэн солих зэрэгт 1,8 тэрбум төгрөг төсөвлөсөн. Мөн хотын инженерийн төв шугам сүлжээ, цэвэр, бохир усны хоолойг засварлах, сургууль, цэцэрлэг зэрэгт болзошгүй аваарын зардалд 1 тэрбум 700 сая төгрөгийг нэмж тусгаснийг  төлөөлөгчдөөс гарсан  санал дээр үндэслэн уг зардлыг 206 сая төгрөгөөр нэмэгдүүлэн төсвийн тодотголыг хэлэлцэн баталлаа.