Зам тээврийн ослоос урьдчилан сэргийлэх "Нэг зам-Нэг соёл" аян Орхон аймагт нээлтээ хийлээ

Цагдаагийн ерөнхий газраас "Нэг зам-Нэг соёл" нөлөөллийн аяныг өнөөдрөөс улс орон даяар эхлүүллээ.  Өнгөрсөн гурван жилийн хугацаанд цагдаагийн байгууллагаас иргэдийн эрх зүйн мэдлэгийг нэмэгдүүлэх, замын хөдөлгөөнд оролцох хандлагыг сайжруулах зорилгоор "Яараад яахав дээ", "Ирээдүйгээ хамгаалъя", "Аажуу явбал аяндаа хүрнэ дээ" зэрэг нөлөөллийн аяныг өрнүүлж ирсэн.

Гэсэн ч  баяр наадмын урт амралт, баяр зугаалгын улиралд  хөдөөг чиглэсэн хөл хөдөлгөөний улмаас орон нутгийн замд гарах зам тээврийн осол буурахгүй байгаа билээ. Тухайлбал,  2020 онд 430, 2021 онд 383, 2022 онд 539 хүн зам тээврийн ослоор амь насаа алджээ.

Иймд "Орон нутгийн зам хөдөлгөөний соёл 2023" нэгдсэн арга хэмжээний хүрээнд "Нэг зам-Нэг соёл" аяныг наймдугаар сарын 18 хүртэл орон даяар эхлүүлж байна.

Манай аймагт 2022 онд зам тээврийн ослоор гурван хүн амь насаа алдсан харамсалтай тоо байна. Хэдийгээр энэ нь өмнөх оноос хоёр нэгжээр буюу 50 хувиар буурсан үзүүлэлт ч гэсэн зам тээврийн ослоор нэг ч гэсэн иргэнийхээ амь насыг алдахгүй байх нь нөлөөллийн аяны зорилго гэдгийг албаныхан хэлж байв. Аяны нээлтийн арга хэмжээнд аймгийн Засаг дарга С.Батжаргал Цагдаагийн газрын дарга, цагдаагийн хурандаа А.Лхагвадорж, АИТХ-ын  Бодлого төлөвлөлт, хууль, эрх зүйн хэлтсийн дарга Б.Тунгалаг болон бусад албаны хүмүүс оролцлоо.

Аяны хүрээнд зам тээврийн осол, хэргийн улмаас амь нас, эл хөрөнгө хохирохоос урьдчилан сэргийлэх, хөдөлгөөнд оролцогчдын буруу дадал, хандлагыг өөрчлөх, зөв үйлдэлд уриалах, иргэдийн эрх зүйн мэдлэгийг дээшлүүлэх сурталчлан таниулах гэхчлэн олон талт нөлөөллийн ажил арга хэмжээг зохион  байгуулахаар төлөвлөжээ.

Мөн энэхүү аянд нэгдэж буйгаа илэрхийлж аймгийн хэмжээнд үйл ажиллгаа явуулж буй авто сургалтын курс, клубууд жолооч нарт замын хөдөлгөөндөө анхаарал болгоомжтой оролцохыг уриаллаа. Энэ жилийн улс орон дяар өрнүүлж буй нөлөөллийн аянд “соёл” гэдэг үгийг оруулсан нь замын хөдөлгөөнд оролцогч бүр үүрэг, хариуцлага, ухамсарт үйл ажиллагаа  замын хөдөлгөөний дүрмийг мөрдөх гэсэн  агуулга багтсан гэж тайлбарлалаа.