Жаргалант сумын малчид өвөлжөөндөө "ногоон тэжээл" тариалжээ

Өвлийг өнтэй давах нэг арга зам нь малчид өвөлжөөндөө  “ногоон тэжээл” тариалж нөөцлөх гэдгийг сүүлийн үед эрдэмтэн судлаачид хэлж буй. 

Жаргалант сумынхан Хөдөө аж ахуйн их сургуулийн доктор, багшийг урилгаар авч ирэн хөрс бэлдэх технологиос эхлээд тариалах хүртэлх бүхий л үйл явцат малчдын төлөөллөө сургажээ.  
Энэ талаар сумын Засаг дарга Д.Зоригтбаатар өнөөдөр Засаг даргын шуурхай зөвлөгөөний үеэр мэдээлэл хийлээ.  Эхний ээлжинд гурван малчин өрхийн өвөлжөөний  1.2 га талбайд  тариалалт хийсэн байна. Амжилттай ургавал ирэх жилээс бүх малчдын өвөлжөөнд “ногоон тэжээл” тариалах боломж бүрдсэн  талаар хэлж  байв. 

Малчид өвөлжөөндөө “ногоон тэжээл” тариалж түүнийгээ нөөцөлж чадвал  өвлийг өнтэй давах нэгэн чухал хөшүүрэг болох юм.  Аймгийн Засаг дарга С.Батжаргал “Малчид өвөлжөөндөө “ногоон тэжээл”  тарих тухай асуудал Монгол Улсын Засгийн газрын төвшинд яригдаж байгаа. Энэ ажлыг Жаргалант сум манлайлан эхлүүлсэн нь их сайшаалтай” хэмээв.  “Ногоон тэжээл” нь байгалийн өвстэй зүйрлэхийн аргагүй өндөр,  уургийн агууламж сайтай тэр хэрээрээ өндөр үр шимтэй байдаг ажээ.