ЗГХЭГ-ын дэд дарга У.Бямбасүрэн тэргүүтэй албаны хүмүүс Орхон аймагт ажиллаа

Монгол Улсын Засгийн газрын хэрэг эрхлэх газрын дэд дарга У.Бямбасүрэн, Орон нутгийн удирдлага, зохицуулалтын газрын дарга П.Зоригтбаатар, ЗГХЭГ-ын даргын зөвлөх Ү.Амарбат, тэргүүтэй  албаны хүмүүс өнөөдөр Орхон аймагт ажиллаж, аймгийн ЗДТГ, Уртын гол багт баригдаж буй 260 айлын орон сууц, Эрдэнэ багийн байр, Мэдээлэл шуурхай удирдлагын төв, ХУРДАН төвийн үйл ажиллагаатай танилцлаа. 

Энэ үеэр  аймгийн Засаг дарга С.Батжаргал, ЗДТГ-ын дарга Ш.Ганболд, Төрийн захиргаа удирдлагын хэлтсийн дарга М.Жанболат нар  Монгол Улсын Засгийн газрын 2020-2024 оны үйл ажиллагааны хөтөлбөр, Монгол Улсын “Алсын хараа - 2050” урт хугацааны хөгжлийн бодлого, Шинэ сэргэлтийн бодлоготой уялдуулан аймаг орон нутагт хийж хэрэгжүүлж буй онцлох ажлаа танилцуулж, мэдээлэл өглөө. 

     Албаныхан эхлээд Уртын гол багт баригдаж буй 260 айлын орон сууцтай танилцав. Хот суурин газрыг дахин хөгжүүлэх хэсэгчилсэн ерөнхий төлөвлөгөөний хүрээнд гэр хорооллыг орон сууцжуулах зорилгоор  орон нутгийн төсвийн хөрөнгө  оруулалтаар эхлүүлсэн “Орлогод нийцсэн орон сууц” төслийг албаныхан томоохон бүтээн байгуулалт болохыг онцолсон. 
Аймгийн хэмжээнд нийт долоон байршилд “Орлогод нийцсэн орон сууц”  төслийг хэрэгжүүлэхээр төлөвлөж байгаа юм.

Үүний дараа аймгийн алслагдсан Эрдэнэ  багийн байр, тус баг дээр ашиглалтад оруулсан Цахим булантай  танилцахын зэрэгцээ  багийн дарга, хэсгийн ахлагч нартай санал солилцов. 
Улсын төсвийн хөрөнгө оруулалтаар 2021 онд ашиглалтад орсон тус багийн байранд Өрхийн эмнэлэг, цагдаа гээд төрийн бүхий л байгууллага төвлөрч найман мянган  иргэнд  төрийн үйлчилгээг хүргэж буй.

Аймгийн Засаг даргын санаачилгаар иргэдэд төрийн үйлчилгээг ойртуулах зорилтын хүрээнд төрийн анхан шатны нэгж Багуудад цахим үйлчилгээг нэвтрүүлснийг  Засгийн газрын хэрэг эрхлэх газрын дэд дарга У.Бямбасүрэн сайшааж, Орхон аймаг цахимжилтаараа бусад аймаг, орон нутгаа тэргүүлж, манлайлж ажилладаг  болохыг онцолсон. 

Энэхүү ажлын хүрээнд  Баян-Өндөр, Жаргалант сумын 29 багт “Иргэний цахим булан”-тай болсон билээ.  “Багийн хөгжлийг дэмжих хөтөлбөр”-ийн хүрээнд уг ажлыг зохион байгуулж, орон нутгийн төсвийн 58 сая төгрөгийн хөрөнгө  оруулалтаар шаардлагатай техник хэрэгсэлээр хангасан.   Энэ оны эхний хагас жилийн байдлаар 1000 гаруй иргэн  цахим булангаар үйлчлүүлж лавлагаа мэдээлэл аван, төрийн байгууллага, албан тушаалтанд санал, хүсэлтээ илэрхийлээд байна. 

Үүний дараа ХУРДАН төв, Мэдээлэл шуурхай удирдлагын төвтэй танилцав.  Энэ үеэр Засаг дарга С.Батжаргал Монгол Улсын Засгийн газраас өгсөн үүрэг чиглэлийн дагуу орон нутагтаа хийж, хэрэгжүүлж  буй зарим ажлынхаа талаар мэдээлэл өгч танилцуулга хийсэн юм. Тухайлбал, Хог хаягдлын менежмент, Инженерийн шугэм сүлжээ, Дахин төлөвлөлт, Цахимжуулалт, Эрүүл мэнд, Боловсролын салбарт хийж хэрэгжүүлж буй ажлынхаа талаар мэдээлэл өглөө. 

Мэдээллийн төв