“Орхон аймаг бүтээн байгуулалт-2023” өдөрлөг болж байна

2023 онд орон нутаг, улсын төсвийн хөрөнгө оруулалтаар хийж буй бүтээн байгуулалтын ажлаа иргэд, олон нийтэд танилцуулах “Орхон аймаг бүтээн байгуулалт-2023” нээлттэй хаалганы өдөрлөг А.Амарын талбайд болж байна.  Уг арга хэмжээнд бүтээн  байгуулалтын ажлыг гүйцэтгэж байгаа 44 компани оролцож хийж буй ажлынхаа явцын талаарх мэдээллийг иргэд олон нийтэд өгч байна.

Аймгийн ИТХ-ын дарга Д.Мөнхбат, Засаг дарга С.Батжаргал тэргүүтэй албаны нээлтийн үйл ажиллагаанд оролцлоо.  Энэ онд орон нутгийн төсвийн  27,7 тэрбум төгрөгийн хөрөнгө оруулалтаар 128 бүтээн байгуулалтын ажил эхэлсэн. Тодруулбал,  барилга, барилга засвар, цахилгаан хангамж, гэрэлтүүлэг, камержуулалт, инженерийн шугам сүлжээ, Авто зам, авто зогсоол, явган хүний зам, “Жишиг гудамж” тохижилт, амралт чөлөөт цагийн талбай зэрэг төрлүүдээр бүтээн байгуулалтын ажлуудыг танилцуулж байна.

Энэ онд эхлүүлсэн томоохон бүтээн байгуулалтын ажлуудаас дурьдвал...

• Урлагийн төрөлжсөн сургалттай “Уран эгшиг” ЕБ-ын сургуулийг өргөтгөж спорт заалтай болгоно. Үүнд 1,3 тэрбум төгрөг зарцуулна.
• Өнгөрсөн онд эхэлсэн Танил зах орчмын 2,9 километр хатуу хучилттай замын ажлыг бүрэн дуусгана.
• Аймгийн төвийн бичил хорооллуудыг тойрсон дугуйн зам тавина,
• Спортын төрөлжсөн сургалттай Ирээдүйн одод сургуулийн спорт заал барина.
• Уртын гол багт баригдаж буй 260 айлын орон сууцны барилгын ажлыг бүрэн дуусгах зэрэг томоохон бүтээн байгуулалт байна.

Иргэд Та бүхэн нээлттэй хаалганы өдөрлөгт оролцож таны амьдарч буй баг, гудамж, талбайд ямар ажил хийж  байгаа мэдээллийг мэргэжлийн  хүмүүсээсс авах боломжтой.

Мэдээллийн төв